Энэ зуны гол шуугианы эзэн болох дөхсөн Португал тоглогч К. Роналду Мачестер Юнайтед багтаа үлдэнэ гэж өөрөө мэдэгдлээ. Түүнийг өнгөрсөн 6 сараас хойш өнөөдрийг хүртэл Эзэн хааны баг Реал Мадридад очих нь гэсэн мэдээллүүд өдөр алгасахгүй гарч байлаа. Реал ээлжит мега одоо авах хүсэлтэй, Роналду ч Мадридад очих хүсэлтэй байсан ч тэдний хүсэл талаар болох нь. Гол шалтгаан нь мөнгө болон Алекс Фергюсон , мөн улирлын эхний хагаст гэмтлийн улмаас тоглох боломжгүй болсон нь болов уу. “МЮ”-ын босс Роналдуг явуулахгүй гэж улайран зүтгэсэн, мөн Реалын зүгээс түүний төлбөр болох сансрын гэмээр их мөнгийг өгч хараахан чадаагүй байх. Тэгээд ч хэдхэн хоногийн өмнө Рафаель Ван дер Ваартыг Мадридын баг худалдан авсан нь Роналдуг энэ жилдээ авахаа больсныг илтгэх мэт.

Хэдийгээр Роналду үлдэнэ гэж өөрөө хэлсэн ч түүний нутгийн ах Луиш Фигу 2000 онд Барсад байхдаа “Таныг Реал руу явах гэж байгаа гэж сонслоо?” гэсэн сэтгүүлчийн асуултанд “Реал руу явах аа, инээдтэй юм. Би хэзээ ч тэгэхгүй” гэж хариулж байлаа. Энэ үед Реал болон Фигу нэгэнт урьдчилсан гэрээ байгуулаад байсан юм. Роналду ах одынхоо араншинг давтахгүй гэхийг үгүйсгэхгүй.

Гэхдээ олонхийн үзэж байгаагаар Роналду “МЮ”-д үлдсэндээ сэтгэл дундуур байгаа бөгөөд энэ улирлыг өнгөрөөгөөд ирэх улиралд гарцаагүй буурь сэлгэх гэнэ.

Энэ цаг үед “МЮ” улирлын өмнөх нөхөрсөг тоглолтынхоо нэгийг “Олд Траффорд”-доо Ювентустай хийж, гоолгүй тэнцсэн байна.

Мөн өөр хэд хэдэн тоглолтууд болжээ.