БНХАУ-ын Бээжин хотод болж буй зуны олимпийн 29-р их наадамд манай тамирчид амжилттай оролцож байна. Бидний гол найдваруудын нэг, Монгол Улсын гавьяат тамирчин, ДАШТ-ын мөнгөн медальт, Ази тивийн аварга Энхбатын Бадар-Ууган олимпийн наадмын боксын 54 кг-ийн жинд эхний 2 учраагаа онооны илт давуугаар ялаад байсан билээ. Тэгвэл өнөөдөр тэрээр хүрэл медалийн төлөө Ботсваны тамирчин Кумисо Икгополентай учраа таарч, тоглолоо. Манай тамирчин тоглолтын эхнээс л санаачилгыг бүрэн авч, ур чадвар, арга техникийн илт давуутай тоглолтыг үзүүлэн 15:2-оор бахдалтай сайхан ялж, хүрэл медалийн болзол хангалаа. Гавьяат маань ийнхүү олимп дэлхийн медальтай болж байна. Хэдий хүрэл медаль халаасанд нэгэнт орсон ч үүндээ сэтгэл ханалгүй медалийнхаа өнгийг хувиргах нь тодорхой. Түүнд дахиад 2 ялалт дутуу байна. Одоо эхний учраа нь Молдавын Гояан Вьячеслав бөгөөд түүнийг ялвал олимпийн аваргын төлөө тоглох болно.