Удирдсан тамирчин нь олимпийн аварга болсонд баярлаж хөөрсөн Монгол Улсын гавьяат тамирчин Х.Болдбаатар ярилцлага эхлэхийн өмнө ингэж асуув. Тэрбээр “Жижигхэн хүн том хүнийг ялна, тэр юу вэ?” гэлээ. Үүнийг Рио-де-Жанейрогийн ДАШТ-ий дараа Ц.Цэрэнпунцаг гарьд, Ц.Гэрэлт-Од начин нар “зохиожээ”.Жиндээ жижигт орох Н.Түвшинбаяр үнэмлэхүйд үлэмж биетнүүдийг хазайлгасаар хүрэл медалийн төлөө барилдаанд шалгарахад нь догдолсон тэдний онгод ийм оньсогыг төрүүлсэн аж.

Монгол Улсын хөдөлмөрийн баатар, олимпийн аварга Найдангийн Түвшинбаяр 2002 онд “Аварга” БТДС-д орсноор гавьяат тамирчин Х.Болдбаатарын шавь болж байсан юм.

-2002 оноос та аваргыг удирдаж байгаа бил үү?
-Би 2001-ээс 2003 оны хооронд Японд мэргэжил дээшлүүлэхээр урт богино хугацаагаар хэдэн удаа явсан. 2002 оны намар Н.Түвшинбаяр “Аварга” БТДС-д элсэхэд миний явах таараад шинэ оюутныг сургаж чадаагүй. Харин дараа жилийн гуравдугаар сараас энэ хэдэн хүүхдийг бэлтгэл хийлгэх болсон. Тэр үед манай “Аварга”-ын бэлтгэл их сайн байсан. Шигшээгийнхэн ирээд манай бэлтгэлийн ачааллыг даадаггүй байлаа. Тэгэхэд тэнд тэсч үлдсэн хэд одоо шигшээгийн тамирчин болоод явж байна.

-Та бэлтгэлдээ ямар зарчим баримталдаг вэ?
-Би Кога, Такэмото, Ёшида нарын олимпийн аваргуудыг төрүүлсэн нэр хүндтэй сургуульд байснаараа бахархдаг. Одоогийн Японы шигшээгийнхнээс Мүнэта, Оно, Изүми нарын дэлхийн аварга, медальт жүдочид байна. Энэ сургуулийн дэглэм маш хатуу, бэлтгэлийг хийсэн шиг хийдэг. Дөнгөж орсон арваадхан настай хүүхдүүд ах нарынхаа кимоног орой 11 цагт угаагаад өглөө 5 цагийн бэлтгэлийн өмнө өмсөж жаврыг нь гаргаж дулаацуулж өгөхийг харсан. Японы өвөл Монголынхоос ч хүйтэн. Би энэ хэмжээнд хүрэхгүй ч ёс журмыг нь сургахсан гэсэн үзлээр шавь нараа хүмүүжүүлдэг. “Аварга”-д багшилж байсан тэр үе одоогийнхоос хамаагүй жаргалтай байжээ. Өөрийн гаргасан төлөвлөгөөгөөр ажиллаж, дураараа байдаг. Гэтэл одоо хамаг юмыг дээрээс гаргаад өгчихнө. Түүнд таалагдах ч юм байна, таалагдахгүй ч юм бий. Яг хүссэнээрээ байж чадахгүй болохоор шигшээгээс гараад өөрөө клубт ажиллахсан гэж боддог байлаа.

-Н.Түвшинбаяр гарны гэмтлээс болоод нэг хэсэг барилдаагүй. Магадгүй энэ нь арай хожуу амжилт гаргахад нөлөөлсөн юм болов уу?
-Чиндаод болдог олон улсын тэмцээнд манай хүүхдүүд л оролцдог байсан. 2004 онд бас яваад ирэхэд Н.Түвшинбаяр гараа сойчихсон мөнгөн медаль авсан гээд ирж байлаа. Гэтэл Изүми хөшөөд хугалчихсан юм билээ. Энэ мэт гэмтэл их авсан. Сая л гэхэд баруун өвдөг, зүүн мөргүйгээр л аварга боллоо шүү дээ. Бид олимпийн дараа эмчлүүлье гэж ярьж байсан. Харин аварга болчихлоо, одоо эрүүл сайхан болж байгаад амжилтаа давтана аа.

-Шавийнхаа барилдааны талаар ямар үнэлэлт, дүгнэлт өгөх вэ?
-Маш олон хүний хөдөлмөр шингэсэн медаль, энэ. Шигшээ багийн таван дасгалжуулагч, бэлтгэл хангагч, багийнхан, мөн хөрөнгө санхүү болон сэтгэл санаагаар дэмжиж байсан бүхий л хүний хүч шингэсэн медаль.