-Лигийн шилдэг багуудын нэг Юта Жаз энэ улирлын дараа хэцүүхэн асуудалтай тулгарна. Одоо багт нь байгаа тоглогчдоос ердөө 5-хан тоглогч нь ирэх 2009-2010 оны улиралд Жаз хэвээр үлдэнэ.

Бусад нь гэрээ нь дуусч байгаа. Дерон Уилльямс, Си. Жей. Майлс, Мэтт Харпринг, Андрей Кириленко, Коста Куфо нараас бусад нь энд дахиж тоглохгүй ч байж магадгүй. Тиймээс ирэх зун Ютагийн боссууд олон чухал шийдвэрүүдийг гаргах хэрэгтэй болох нь.

- Одоог хүртэл учир зүй, хэл амаа ололцоогүй байгаа, мөн ерөнхий менежер Жон Пэксон нь түүний талаар юу ч хэлээгүй байгаа ч  давуу эрхт чөлөөт агент Бен Гордоныг багтаа үлдэх болно хэмээн Чикагогийн эзэн Жерри Рейнсдорф мэдэгдлээ.

-Детройт Пистонс довтлогч Жэсон Максиеллдаа 3 жилийн хугацаатай, 15 сая орчим долларын гэрээний санал тавьжээ.

-Майами Хитийн дасгалжуулагч Эрик Споелстра хэлэхдээ “Багийн гарааны холбон тоглогчийн төлөө Маркус Бэнкс, Марио Чалмерс, Крис Куинн нар ширүүн өрсөлдөж байна. Шинэ тоглогч Чалмерсийг гарааны холбогч болгоход ч гэсэн би бэлэн байна ” гэжээ.

-Лос Анжелес Лейкерс баг ирэх улиралд талбайдаа хийх 7 чухал тоглолтныхоо тасалбарын үнийг нэмсэн байна. Ач холбогдол өгсөн дээрх 7 баг нь финалд ялагдсан Бостон, ЛеБронтой Кливленд, мөн бүсийнх нь гол дайснууд болох Нью Орлеан, Финикс, Даллас болон Хьюстон юм байна.

- Кливленд баг хамгаалагч Делонтей Уэсттэйгээ гэрээгээ сунгалаа. Гэрээ ёсоор Уэст ирэх улиралд 3 850 000 доллар, 2009-2010 онд 4 235 000 доллар, 2010-2011 онд 4 620 000 доллар, нийтдээ 3 жилд 12 сая 705 мянган доллар авах нь.  Ер нь Кавальерсчууд ЛеБрон Жеймст томоохон дүнтэй гэрээ санал болгохын тулд цалингийн цэсээ дүүргэхгүй байх арга хэмжээ авч байна. Иймээс бусад тоглогчидтойгоо аль болохоор бага цалин олгох гэрээ хийж байгаа юм.

-Өнгөрсөн улирлын аварга Бостон Селтиксийн тоглогчид, дасгалжуулагчид, бусад албаны хүмүүс, ажилчид өнөөдөр АНУ-ын ерөнхийлөгч Ж. Буштай уулзаж, “Цагаан ордон”-д зочилж байна.

- Өнгөрсөн улиралд гэмтлийн улмаас бараг тоглоогүй Гилберт Аренасаас түүний фэнүүд болон Вашингтоны үзэгчид энэ улиралд ихийг хүлээж байлаа. Зун багтайгаа супер гэрээ хийсэн (6 жилийн 111 сая доллар), өнгөрсөн улиралд гэмтлээ сайтар эмчлүүлсэн гээд хурдхан л баллаад өгөхийг нь хоног тоолон хүлээж байсан байх. Гэвч Аренасын ирээдүйн кареер аюулд учирч болзошгүй байна. Яг л Грант Хилл, Пенни Хардуэй хэрхэн уруудсан шиг. Тэр зүүн өвдгөндөө дахин буюу 3 дахь хагалгаагаа хийлгэх гэж байна. Тоглох боломжтой хугацаа нь 12 сарын эхэн. Бүх юм сайнаар өрнөвөл тэр урьдын сайхан тоглолтоо үзүүлж чадна, саараар эргэвэл Аренас дээрх 2 шиг азгүй тоглогч болж, асар их гэрээний мөнгийг нь аль нэгэн золгүй даатгалын компани төлөх хэрэг гарах биз ээ.