Льюис Хэмилтон энэ улирлын 6 дахь, кареерынхаа 12 дахь поул позишныг Японд авлаа. “Формула-1″-ийн энэ жилийн сүүлээсээ 3 дахь гарааны жинхэнэ уралдааны гарааг дэлхийн аварга цолны төлөө өрсөлдөж байгаа тэрээр хамгийн эхний байрлалаас хийх боллоо.

Хэмилтон өөрөө эхний даалгавраа сайн гүйцэтгээд зогссонгүй түүний багийн анд Хейки Ковалайнен ч үүргээ гүйцэтгэж Ферраригийн Фелипе Массагаас сайн цаг үзүүлэв. Тэр ч бүү хэл 2 топ багаас харьцангуй муу машинтай байгаа Реногийн Фернандо Алонсо хүртэл Массагийн өмнө оров. Ингэснээр дэлхийн аварга цолыг мөрөөдөж байгаа Масса бүр 5-р байраас гарааг хийх боллоо. Өөрөөр хэлбэл поул позишнд Льюис Хэмилтон болон “Зохион бүтээгчдийн цом”-ын төлөө өрсөлдөж байгаа Макларен бүрэн ялалт байгууллаа. Поул позишны дараа Хэмилтон “Би маш баяртай байна. Баг маань төгс ажилласан” гэсэн байна. Харин Масса “Q1 болон Q2-т миний машин их хурдан, баланс нь сайн таарсан байсан. Харин Q3-т юу болчихсоныг би мэдэхгүй байна. Маргаашийн уралдаан амаргүй байх болно. Гэхдээ бид хамгийн сайнаар өөрсдийн ажлаа хийнэ” гэжээ.