Ням гаригт Английн хөлбөмбөгийн Премьер лигийн ээлжит тоглолт Челси – Ливерпуль багуудын хооронд болно. Хүснэгтийг адил онооотой тэргүүлж байгаа энэ 2 баг одоогоор лигтээ хожигдоогүй яваа. Энэ тоглолтонд ялагч тодорвол тэр баг лигийг ганцаараа тэргүүлж эхлэх болно.

Челси – Ливерпуль өмнө нь хоорондоо лигтээ 130 удаа тоглож, Челси 44, Ливерпуль 58 хожиж, 28 удаа тэнцэж байв. Челси лигтээ сүүлийн 4 жил Ливерпульд талбай дээрээ хожигдоогүй төдийгүй гоол алдаагүй.  Хамгийн сүүлд “Улаанууд” 2004 оны 1-р сард Бруно Шейругийн гоолын ачаар 1:0-ээр хожиж байлаа. Мөн Челси одоогоор 29 тоглолт дараалан лигтээ хожигдоогүй яваа бол Ливерпул 15 тоглолт дараалан ялагдал гээчийг амссангүй.

Челсигийн Николья Анелька 250 дахь ПЛ-ийн тоглолтоо хуучин багийхаа эсрэг хийх гэж байна. Тэрээр 2001-2002 онд зээлээр Ливерпульд 20 тоглолт хийж, 4 гоол хийж байсан байна. Харин Анелька өмнө нь тоглож байсан багийнхаа эсрэг сайн тоглодог нэгэн. Тэрээр хуучин багуудынхаа  эсрэг ПЛ-т нийт 22 тоглохдоо 13 гоол хийж байж. Ливерпултэй 8 тоглож 4 гоол, Арсеналтай 9 тоглож 6 гоол, Манчестер Сититэй 5 тоглож 3 гоол тус тус хийж байжээ.

Рафаель Бенитез менежер болсноос хойш Ливерпулчууд лигийн акулууд болох МЮ, Арсенал, Челси 3-ын талбайд нийт 12 тоглохдоо нэг ч хожиж байгаагүйгээр барахгүй боломжит 36 онооноос ердөө 2-ыг л авсан байх юм.  Мөн 12 тоглохдоо дөнгөж 4 гоол оруулсан нь итгэмээргүй муу амжилт.

Гэхдээ одоогоор “Хотон шувуунууд” айлын талбайд 8 тоглолт дараалан хожигдоогүй байгаа. Энэ нь тэдний Премьер лиг дэх шилдэг цуврал нь.

Робби Кин одоогоор энэ улиралд лигтээ 8 тоглолтонд 603 минут тоглоод байгаа ч ганц ч гоол хийгээгүй хөгөө чирж байна.  Энэ нь Кинийг энэ улиралд хамгийн удаан хугацаанд гоол хийгээгүй Премьер лигийн довтлогч болгоход хангалттай хугацаа. Стоук Ситигийг Дэйв Китсоноос 27 минутаар их байгаа. Гэхдээ Кин өмнө нь Тоттенхэмд байхдаа 2006 оны 4 сараас 11 сар хүртэл 12 тоглолт дараалан гоол хийгээгүй тохиолдол бас бий.