“TLG-13″ төрийн бус байгууллагаас зохион байгуулж буй сагсан бөмбөгийн холбоодын цомын тэмцээн даваа гаригт Спортын төв ордонд эхэллээ. Тэмцээнд дээд лигийн Хасын хүлэгүүд, ШУТИС, Ёлууд, Халлелуяа, Хараагийн Харцага, Лидер багууд, сонирхогчдын лигийн Чөтгөрүүд, Монатка, Мон-Магнит, Ийгл-Мон Алтиус, Бридж Старс, ТЭЦ-4 гэсэн нийт 12 баг багууд 4,4-өөрөө 3 хэсэгт хуваагдан тоглож байна. Эхний өдрийн гол сенсаацыг сонирхогчдын лигийн анхны тэмцээний аварга Мон-Магнит баг тарьж, лигийн хамгийн сайн бэлтгэлтэй байгаа Халлелуяа багийг буулган авлаа. Халлелуяа багийн бүрэлдэхүүн энэ жил ихэд хүчирхэгжсэн бөгөөд ШУТИС-ын тоглогч Одбаяр, Түмэнжаргал, МУИС-ын Азбаяр, Ёлуудын Пүрэвцэрэн нарыг эгнээндээ нэгтгээд байгаа юм. Мөн “Спрайт” лигийн аварга Монатка баг дээд лигийн 3 удаагийн аварга Лидерүүдтэй сүүлийн мөч хүртэл тэнцүүхэн өрсөлдөж, 92:94 буюу 2-хон онооны зөрүүгээр ялагдлаа. Энэ тоглолтонд  Монатка багийн тоглогч Нямдаваа зөвхөн холын зайнаас л гэхэд 11 удаа оновчтой довтолсон байна.

Маргааш тоглолтууд үргэлжлэн явагдах бөгөөд хэсэг тус бүрийн эхний 2 баг болон 3-р байранд орсон багуудын сайн үзүүлэлттэй 2 баг нь хасагдах шатанд шалгарна.