Аллен Айверсон, Кармайло Энтони, Кэнион Мартин нарыг эгнээндээ нэгтгэсэн муугүй хүчтэй Денверчүүдийн хувьд шинэхэн улиралд нэг их том гойд өөрчлөлт хийлгүйгээр эхлэх бололтой.

Тэдний хувьд хамгийн том хийсэн хөдөлгөөн нь шилдэг төвийн тоглогч Маркус Кэмбигээ Лос Анжлес Клипперст нэг их үнэрхэлгүй хямдхан буюу 2010 оны драфтын хоёрдугаар бүсийн эрхийн төлөө өгч орхисон юм.

Өнгөрсөн дөрвөн жил дараалж ПОд шалгарсан ч эхний үеээс давж үзээгүй болохоор дасгалжуулагч Жорж Карл халагдах дээрээ ирээд байгаа.Түүнийг өнгөрсөн жилийн ПОын төгсгөлд халах тухай яриа гарч байсан ч мань эр багтаа өөрчлөлт хийх болно гэж амлаж байж ажилдаа үлдсэн билээ.Түүний хувьд хамгийн гол асуудал нь хамгаалалтыг сайжируулахад оршиж байлаа.

Үүний үндсэнд үнэтэй мөн ахмад төвийн тоглогч Маркус Кэмбигээ ЛА Клипперст, довтлогч Эдуорда Нехараг Нью Жэрси руу явуулсан бөгөөд оронд нь төвийн тоглогч Крис Эндерсон, , довтлогч Дэнти Жонес, довтлогч Жуван Ховард, довтлогч Реналдо Болкман, хамгаалагч *Сонни Веемс нарын тоглогчдыг эгнээндээ нэгтгэсэн билээ.

Холбогч – Энтони Картер, Чайк Эткинс, Аллен Айверсон.

Денверийн хамгийн сул байрлал гэж хэлж болно. Холбогч Энтони Картер гоц гойд амжилт үзүүлж байгаагүй боловч хөгширсөн хойноо буюу өнгөрсөн жил гайгүй тоглож үзэгдсэнээр гараанд гарах болсон юм. Харин түүний амарч байхад талбайд байх учиртай гурвын буудагч Ч.Эткинс салтааны гэмтэлний улмаас нэг хэсэгтээ л тоглохгүй болсон. Тиймээс Айверсон хүссэн хүсээгүй энэ байрлалаас тоглох нь. Айверсоны хувьд шагайны гэмтэлний улмаас сорилго тоглолтуудын ихэнхийг өнжсөн. Гэхдээ энэ гэмтэл нь тийм ч ноцтой биш гэнэ. Энэ байрлалд цагтаа Лос Анжлест гарааны холбогч хийдэг байсан Смуш Паркерийг авч тоглуулсан ч удалгүй жийсэн байналээ.

Хамгаалагч – Аллен Айверсон, Ж.Р.Смит, Дэнти Жонес, Сонни Веемс.

Аллен Айверсон тал минутаа холбогчын байрлалаас гарч тоглох бол түүний араар нисдэг Ж.Р.Смит, Дэнти Жонес, Сонни Веемс гээд дандаа нисдэг мангасууд гарах нь. Шинэ тоглогч Сонни Веемс гэмтлийн улмаас сар гаруй хугацаанд талбайд гарахгүй бол өдрөөс өдөрт сайжирч байгаа Ж.Р.Смитийг энэ жил шилдэг нөөц тоглогч болохгүй гэсэн баталгаа байхгүй юм. Ж.Р.Смит гараанд гарахад ганц асуудал байдаг нь хамгаалалт маш муу байдагтай холбоотой билээ. Мэмфисээс ирсэн Дэнти Жонесын хувьд Ж.Р.Смитээс дутахгүй нисдэг, данк хийдэг. Хамгаалалт ч арай дээр ч гэсэн шидэлт огт байхгүй нөхөр.

Жижиг довтлогч – Кармайло Энтони, Линас Клэйза, Реналдо Болкман.

Мело энэ байрлалд ихэнх минутыг өнгөрөөнө. Мелог энэ жил хамгаалалтандаа бэлтгэсэн гэж яриад байгаа. Шинэ улирал эхлэхээр хэр хамгаалахыг нь харж л байя. Энэ байрлалд байгаа гурван тоглогчын хэн нь ч хүчний довтлогчын байрлалд тоглочих өлхөн боломжтой харагдаж байна. Линас Клэйза бол довтолгоо сайтай бол Реналдо Болкман хамгаалалт арай илүүтэй. Самбараас гайгүй авчихдагаараа Мело хүү хааяа хүчний довтлогчын байрлалд шилжих болов уу.

Хүчний довтлогч – Кэнион Мартин, Жувон Ховард.

Гэмтэл бэртлийн их уурхайн нэг болох Кэнион Мартины үзүүлэлт өсөх магадлалтай. Хэрвээ тэрбээр ядаж өнгөрсөн жилийнх шигээ 70 тоглолтонд оролцож чадвал багт маш их хэрэгтэй. Денверийн самбар доорх хамгаалалт К-Март хэр байхаас шалтгаална. Түүний араар ахмад Жувон Ховард гарах юм байна. Түүний хувьд хур их туршлагатай, цагтаа од гэгдэж явсан тоглогчдын нэг.

Төв – Нэнэ, Стивен Хантер, Крис Эндерсон.

Бразил гаралтай үнэ өндөртөй, шилэн Нэнэд Жорж Карл их найдаж буйгаа илэрхийлсээр байгаа. Лавдаг хоосонгүй эр боловч гэмтэл гэдэг хэлж ирдэггүй хийсч ирдэг гай гэж нэг юм бий. Энэ гайнаас холхон байж чадвал болоод явчихна. Хар тамхины хэрэгт орооцолдож НБА – д тоглох эрхээ хоёр жилээр хасуулж байсан Крис Эндерсон сагсны талбайдаа эргэж ирээд тун гайгүй тоглож байгаа. Кэмбиг бодвол довтолгоо талдаа их сайн. Стеван Хантерийн хувьд муугүй блокчин боловч Карл түүнд нэг их минут өгч харагдадгүй. Одоо хүссэн хүсээгүй тоглуулах бизээ.

Мело саяхан багаа дүгнэхдээ бид 50 эсвэл 60 ялна гэж найдаж байна гэсэн байналээ. Мөн Кэнион Мартин шинэ улиралын тухай сэтгэгдэлээ хэлэхдээ “60 тоглолт, бид өнгөрсөн жил 50 ялж баруун бүсэд наймд бичигдсэн. Энэ жил 60 ялж ТОП 3т орохыг зорилго болгосон” гэжээ. Денверийнхэн Кэмбиг явуулсандаа санаа зовохгүй байгаа бөгөөд тэд Мартин ба Нэнэд найдаж байгаа нь тодорхой, гэвч Кэнион Мартин өнгөрсөн гурван жилд 117 тоглолт, Нэнэ 165 тоглолт тус тус өнжсөн. Шалтгаан нь гэмтэл. Мөн суперстар Аллен Айверсон өвдөг болон, шагайны гэмтэлтэй байгаа нь багын дотоод дахь гол асуудал болжээ. Юутай ч Карл түүнийг улиралын эхнээр ачаалал өгч тоглуулах бодолгүй байгаа гэнэ.

Миний бодлоор гэмтлээс хол байж хамгаалалтандаа анхаарал хандуулж чадах юм бол ТОП 3 болох боломжтой, гэхдээ юутай ч өнгөрсөн жилийнхээ амжилтыг давтчих болов уу.