Энэ оны мастеруудын цувралын сүүлийнх нь болох Парисын тэмцээний шилдэг 8 теннисчин тодорлоо. 2 сая 270 мянган еврогийн шагналын сантай Парисын цувралын дунд шөвөгт:

Энди Мюррей – Давид Налбяндан

Рожер Федерер – Жеймс Блэйк

Рафаель Надаль – Николай Давыденко

Энди Роддик – Жо Вильфред Цонга нар учраа таарлаа.

Өнгөрсөн тойрогт Францын Цонга дэлхийн чансааны 3-т бичигддэг Новак Жоковичийг буулгаж авсан. Энэ 2 тоглогч оны эхэнд Австралийн нээлттэй тэмцээний шигшээд тоглоход Серби тоглогч хожиж байлаа.  АНУ-ын Энди Роддик Францын Гилле Саймоныг хожсоноор 6 дахь жилдээ дараалан Шанхайд болдог Мастеруудын цомд оролцох эрхтэй болов.

АНУ-ын бас нэг теннисчин Жеймс Блэйк одоогоор чансаагаараа 11-т бичигдээд байгаа бөгөөд Парист хэрэв шигшээ тоглолтонд үлдэж чадвал Шанхайг зорих боломжтой болох юм. Үүний тулд эхлээд Рожер Федерерийг аргалах хэрэгтэй.

Энди Мюррейгийн ялалтын цуврал 14-т хүрээд байна. Тэрээр Америкийн нээлттэй тэмцээний шигшээд Федерерт ялагдсанаасаа хойш 14 тоглолт дараалан хожоод байна. Энэ цуврал 15-д хүрэх эсэхийг Налбяндантай хийх тоглолт харуулна.

Тэмцээний аварга ням гаригт тодорно.