Энэ сарын 1-5-нд Тайландын Бангкок хотноо буудлагын Дэлхийн цомын шигшээ тэмцээн боллоо. Тэмцээнд манайхаас олимпийн мөнгөн медальт О.Гүндэгмаа, ОУХМ Ц.Мөнхзул нар уригдан оролцсон юм.

Мөн Германы харьяат, Монгол Улсын гавьяат тамирчин Д.Мөнхбаяр онч сорьсон. Дэлхийн шилдгүүд цугларсан тус тэмцээний спорт гар бууны 25 м-т Д.Мөнхбаяр 793,1 оноогоор тэргүүлснээр (590+203,1) “World Cup Final”-ийн аварга боллоо. Тэрбээр өмнө нь тус тэмцээнээс хошой мөнгөн медаль зүүж байсан юм. Удаах байрт Францын Стефани Тирод 792,5, Болгарын Мария Гроздева 787,1 оноогоор тус тус орсон. О.Гүндэгмаагийн хувьд урьдчилсан буудлагад 578 онож тавдугаарт шалгараад шигшээд 206,1 оноо авснаар тавдугаар байраа хадгалж үлджээ. Ц.Мөнхзул 779,3 оноогоор (574+205,3) наймдугаар байр эзлэв

1.Доржсүрэнгийн Мөнхбаяр (Герман)-793,1 (590+203,1)
2.Стефани Тирод (Франц)-792,5 (589+203,5)
3.Мария Гроздева (Болгар)-787,1 (581+206,1)
4.Ясна Секарич (Серб)-786,2 (584+202,2)
5.Отрядын Гүндэгмаа (Монгол)-784,1 (578+206,1)
6.Славомира Шпек (Польш)-782,0 (576+206)
7.Лалита Яхлеская (Австрали)-780,9 (577+203,9)
8.Цогбадрахын Мөнхзул (Монгол)-779,3 (574+205,3)