Өнөөдөр НБА-ын талбайд 2 тоглолт явагдлаа. Орландо Мэжик талбай дээрээ Филадельфиг хүлээн авч лидерүүдийнхээ болон холбон оглогч Жамер Нельсоны сайн тоглолтын ачаар ялалт байгуулав. Нельсон энэ улирлынхаа хамгийн өндөр үзүүлэлт болох 16 оноо авч, 9 оновчтой дамжуулалтыг хийжээ.

Нельсоныг тоглолтын дараа Орландогийн дасгалжуулагч Стэн Ван Ганди “Тэр пик энд рол (буюу заслон тавиад эргээд сулардаг) довтолгооны хувилбарыг маш сайн ашиглалаа. Энэ тоглолт Нельсоны энэ жил гаруйн хугацаан дахь хамгийн сайн тоглолт нь байсан” хэмээн магтжээ. Филли 23 онооны хожигдлоо 4-р үед 6 болгон ойртуулсан ч үүнээс ихийг хийж чадсангүй. Ийнхүү маш их итгэл, хүлээлттэйгээр улирлыг эхлүүлсэн 76-чууд одоогоор 6 тоглож, 4 хожигдоод байна.

Өрнөд бүсийн Портлэнд-Хьюстоны тоглолт нэмэлт цагт шийдэгдлээ. Нэмэлт цагийн сүүлийн 1.9-хэн секундэд итгэмээргүй шахуу явдлууд олон болов. Энэ богинохон хугацаанд тэргүүлэгчийн байр 3 удаа солигдсон гээд төсөөлөөд үз. Тоо тэнцүү 96:96 байхад Портлэндийн Б. Рой эргэлттэй шидэлтээр багаа 2 оноогоор илүү гаргав. Рокитс мөчөөгөө өгсөнгүй, Яо мөн 2 оноо авч, дээр нь түүн дээр алдаа гаргаснаар торгуулийн нэмэлт нэг шидэлт хийх эрхтэй болж, Яо ч боломжийг алдалгүй тоог 98:99 болголоо. Рокитс 1 оноогоор тэргүүлж байна. 0.8 секунд үлдсэн. Оноо авах нь битгий хэл шидэж амжих болов уу? Мэдээж амжна. Тэр байтугай 0.1 секундэд ч амждгийг Дэвид Ли харуулсан. Ингээд Блэйк бөмбөгийг тоглолтонд оруулж, шууд Ройд өглөө. Рой аваад шидлээ. Гайхалтай. 3 оноо. Тоо 102:99. Цаг ч дуусав. “Роүз Гарден” цалгиж байв. Лигийн түүхэнд үлдэхээр бас нэгэн тоглолт ийнхүү боллоо.

Рокитс 3 дараалан хожиж гараагаа эхэлснийхээ дараа 2 дараалж хожигдов. Харин Портлэнд талбай дээрээ Сан Антионо болон Хьюстонтой онц сонирхолтой 2 тоглолт хийж, 2-ууланд нь яллаа. Айлын талбай дээр 3 хожигдоод байгаа.

“Орландо” – “Филадельфи” – 98:88 (30:16, 24:27, 21:23, 23:22)

О: Туркоглу – 20 оноо. Льюис – 20 оноо. Нельсон – 16 оноо + 9 дамжуулалт.

Ф: Янг – 19 оноо. Игуодала – 16 оноо  + 11 самбар. Миллер – 15 оноо.

“Портленд” – “Хьюстон” – 101:99 НЦ (21:18, 31:33, 22:20, 16:19, 11:9)

П: Олдридж – 27 оноо + 9 самбар. Рой – 17 оноо. Фернандес – 15 оноо.

Х: Макгрэди – 30 оноо. Скола – 14 оноо . Брукс – 14 оноо.