Германы Дрезден хотноо зохион явагдаж байгаа шатрын 38 дахь Олимпиад 6 дахь тойрогт Монголын шигшээ баг амжилттай өрсөлдөж, ялалт байгууллаа. 3 хожил, хоёр хожигдолтой 47-р байранд явж байсан манай эрэгтэйчүүд дэлхийн чансаанд 32-т бичигдэж байгаа Данийн шигшээг 2,5-1,5-ын харьцаатай буулган авсан байна. Нэгдүгээр ширээн дээр их мастер Гүндаваа ялагдал хүлээсэн хэдий ч 3, 4-р ширээн дээр өрсөлдсөн Ваярмандах, Баттулга нар чансаа өндөр данийн их мастеруудыг ялснаар манай баг 39 дөх байр хүртэл дэвшлээ. Хэрэв тэд өнөөдөр Польшийн эсрэг ялалт байгуулбал эхний 20-т багтах боломжтой юм. Эрэгтэйчүүдийн тэмцээнд өнгөрсөн Олимпиадын аварга Армен дэлхийн чансааг тэргүүлэгч ОХУ-ын багийн өмнө хошуучилж байна.

Монголын эмэгтэй баг амжилтаараа эрчүүдээ хол ардаа орхилоо. 6-р тойрогт Их мастер Мөнгөнтуул тэргүүтэй манай дөрвөл Израэлийн эмэгтэйчүүдийн эсрэг 3-1-ийн харьцаатай тэмцээний 4-дэх ялалтаа байгуулж, 12-р байранд орж ирээд байна. Энэ өдөр хожигдсон Нямтуяа-гаас бусад нь өрсөлдөгчдөө бууж өгөхөд хүргэжээ. Дараагийн тойрогт манай шатарчид Унгарын хүчтэй дөрвөлтэй учраа таарлаа. Дашрамд хэлэхэд, их мастер Мөнгөнтуул 4 хожил, 2 тэнцэж 5 оноо авсан амжилттай энэ үзүүлэлтээр нэгдүгээр ширээн дээр өрсөлдөж байгаа шатарчдаас 2-т, нийт оролцогчдоос 8-д бичигдэж байна. Эмэгтэйчүүдийн төрөлд манай урд хөрш улсын шигшээ итгэл төгс тэргүүлж, араас нь манай хойд хөршүүд нэхэж байна.