Европын хөлбөмбөгийн холбооны хамгийн нэр хүндтэй Аваргуудын лигийн тэмцээний  хэсгийн тоглолтууд явагдаж байна. Одоогоор Интер, Барса, Спортинг, Ливерпуль, Атлетико, МанЮ, Виллареал, Байерн, Лион, Арсенал, Порту, Юве, Реал гэсэн багууд шөвгийн 16 -д шалгарах нь тодорхой болоод байгаа ба зөвхөн хэн нь нэгээр вэ гэдэг асуудал л үлдээд байна. Ингээд өнгөрсөн шөнө явагдсан  хэсгүүдийн тоглолтын дүнг хүргэе. Тоглолтуудын гоолуудыг эндээс харна уу

E хэсэг

Виллареал 0 : 0 Манчестер Юнайтэд

МанЮ : Кушак, О ‘Ши, Эванс, Фердинанд, Евра, Нани (84′ Пак Жи Сун), Андерсон, Каррик (Тевез 85′), Флетчер (80′ Гибсон), Роналду, Рүүни

Хоёулаа хэсгээсээ гарах болсондоо сэтгэл нь ханасан уу, тун уйтгартай тоглолт боллоо. Үзэх харах юмаар хомсхон энэ тулаанд шүүгчийн шүглийн дуу л цуурайтаж байсан ба 5 шар, 1 улаан картаар 2 багийнхан торгуулжээ. Испаний багийн Капдевиллаг Роналду дээр алдаа гарган хөөгдөхөд тэдний дэмжигчид нилээд бухимдсан ба өмнө нь Рүүни хэд хэдэн удаа худлаа унасан нь шар-шумбагчдын фенүүдийг бүр ч “шатаажээ”.
Энэ талаар Сер Фергусон: Руунийгээс иймэрхүү зүйл гарах нь тун ховор. Тэр таклдуулах гэж байна гэж бодсон байх. Тэр дараа нь уучлал гуйж байсан. Магадгүй тэр Пиресийн тоглолтыг их үзсэн байх л даа. Гэхдээ тэр ядаж л уучлалт гуйсан. Харин Пирес хэзээ ч уучлал гуйхгүй‘ гэжээ.

Аальборг 2 :1  Селтик (Сака 73′, Калдвел 87′ автогоол), (53′ Робсон)

Эхний өдрийн хамгийн том сенсаацыг  Даничууд дэгдээлээ. Тэдний энэ ялалт ногоон эрдэнэсийг европын тавцанд цааш өрсөлдөх эрхгүй болгосон ба өөрсдөө УЕФА цомд оролцох боломжтой болжээ.
Мордохын хазгай гэгчээр эхнээсээ л будилсан Селтик айлын талбай дээрээс оноо цуглуулахдаа тун хангалтгүй байгаа ба гэгээлэг зүйл гэвэл лигтээ тэргүүлж байгаа аж.

Баг	Т	Хо	Тэ	Хд	Х/Г	А/Г	Б/Х	Он
Манчестер Юнайтед	5	2	3	0	7	1	+6	9
Виллареал	5	2	3	0	9	5	+4	9
Аальборг	5	1	2	2	7	12	−5	5
Селтик	5	0	2	3	2	7	−5	2

F хэсэг

Байерн Мюнхен 3 : 0 Стеауа (Клозе -57′,71′, Тони – 61′)

Байерн : Ренсин, Оддо,Лам, Ван Буйтен, Лусио (79′ Брено), Зе Роберто, Ван Боммел, Рибери, Швайнштайгер, Клозе, Тони (83′ Боровски)

Румыны багийн сүүлчийн найдварыг Мюнхенчүүд үгүй хийлээ. Эхний хагаст тэд яаж ийгээд хүчирхэг Байернийг зогсоож чадсан ч, дараа нь аргагүй ниргүүлсэн байна. Тоглолтын баатраар мэргэжилтнүүд Рибери, Клозег нэрлэж байгаа ба Франц эр сүүлийн үед үнэхээр багаа авч яваа гэхэд хилсдэхгүй.
Мөн “гоолын ургац муутай” байгаа итали эр Тони энд Мюнхенчүүдийн хамт Аваргуудын лигийн анхны гоолоо оруулсан ба ирэх тойрогт Лион-Байерн хоёр хэсгийн лидер болох тулаанаа хийх нь.

Фиорентина 1 : 2 Олимпик Лион (45′ Жилардино) ,(15′ Макоун ,27 Бензема)

Жилардино  гоолын буухиагаа үргэлжлүүлсэн ч түүний ганц бөмбөг  багтаа тус болж чадсангүй. Улирлын эхэнд Лионыг ихэнх хүмүүс урьдынх шигээ тоглохгүй гэж ярьж байсан ч шийр заан плеи-оффд үлдлээ. Нэн ялангуяа францын ирээдүй Бензема лигтээ ч тэр, европт ч тэр гайхалтай формтой байгааг нь магтахаас өөр яах вэ. Түүний оруулсан гоолд багийн ахлагч Жуниньогийн гавьяа ч бий.

Лион – Ллорес, Крис Бумсонг, Жуниньо, Гроссо, Тулалан, Менса, Мажоун, Кейта (80′ Едерсон), Бензема (90 Пикуйнне). Гову

Баг	Т	Хо	Тэ	Хд	Х/Г	А/Г	Б/Х	Он
Байерн	5	3	2	0	9	2	+7	11
Лион	5	3	2	0	12	7	+5	11
Фиорентина	5	0	3	2	4	8	−4	3
Стеяуа	5	0	1	4	3	11	−8	1

G хэсэг

Арсенал 1: 0 Динамо (86′ Бендтнер)

Сүүлийн үед нилээ асуудалтай байгаа Арсеналчууд маш чухал ялалт байгууллаа. Буучдад Бендтнер ялалтыг авчирсан ба түүний талаар сөрөг ойлголттой явдаг хүмүүсийн бодол өөрчлөгдсөн болов уу. Учир нь Дани эр үнэхээр  гайхалтай финиш хийсэн юм. Фабрегас ч багийн ахлагчийн үүргээ ухамсарлаж гоолын дамжуулалтыг хаясан ба тун үлгэр жишээ үзсэн.
Одоо 12 сарын 10нд Буучид Португалд зочлон хэн нь хэсгийн лидер болохоо үзэх билээ.

Фабрегас : Эхний минутаас сүүлийнх хүртэл бид хичээж сайн тоглолоо, Портутай хийх тулаан үүнээс огт өөр нөхцөлд болно, гэхдээ үүнээс өмнө болох чухал тоглолтууддаа анхаарлаа хандуулах хэрэгтэй байна. (Ирэх амралтын өдөр буучид Челситэй тоглоно)

Арсенал : Алмуниа, Джоуроу, Галлас, Силвестр, Клиши, Денилсон, Фабрегас, Сонг, Рамсеи, Вела, Ван Перси

Фенербахче 1 : 2 Порту (63  Казим Рйчардс), (Лисандро 19′ ,28′)

Туркчууд энэ тулаанд нилээд бухимдсан нь 5 шарт хүртсэнээс нь харагдаж байгаа байх. Хэрвээ ялагдвал Европын тавцангаас хасагдах учир арга ч үгүй биз. Гэвч тэдний уур хилэн юунд ч хүргэсэнгүй. Португалийн багийн лидер Лисандро дубль хийж Фенерийг булшилсан ба ирэх тойрогт тэд хэсгийн лидерийн төлөө тоглох юм.

Баг	Т	Хо	Тэ	Хд	Х/Г	А/Г	Б/Х	Он
Арсенал	5	3	2	0	11	3	+8	11
Порту	5	3	0	2	7	8	−1	9
Динамо Киев	5	1	2	2	3	4	−1	5
Фенербахче	5	0	2	3	4	10	−6	2

H хэсэг

Зенит  0 : 0 Ювентус

Ювентус: Маннингер, Бригера, Мелльберг, Чиеллини, Молинаро, Каморанези (83′ Марчионни), Сиссоко, Марчисио, Недвед, Дел Пиеро (77′ Жиовинко), Якуйнта (86′ Амаури)

Хэсгээсээ гарах нь нэгэнт тодорхой болсон Хуучин ноёдын хувьд энэ тулаан тийм ч ач холбогдолгүй байж болох ч, Оросуудад үхэх сэхэхээ үзэх чухал тоглолт байсан юм. Дик Адвокат бэртэлтэй байгаа Ли Хо, өмнөх тулаанд улаан жавтий хүртсэн Пюгрениер хоёроос бусад бүх шилдгүүдээ гаргажээ.
Гэтэл энэ чухал тоглолтдоо Петербургчууд тун хангалтгүй үр дүнг үзүүлж хуурай тэнцлээ. Мэдээж хоёр багийн довтлогчид зүгээр суугаагүй нь тодорхой ч, гоол оруулчих аз дутлаа. Ялангуяа португаль эр Данни сүүлийн хагаст Бианконерд багагүй төвөг удаж байсан ба өөр онцолчихоор гойд сайн хүн харагдсангүй. Харин хоёр багийн хаалгачдыг магтахгүй бол алдас болох байх. Буффоныг маш сайн орлож байгаа Маннингер Зенитийн олон довтолгооны няцаасан ба Малафеев ч түүнээс дутахгүй гавьяа байгуулсан юм.

Дик Адвокат (Зенит багийн менежер)  “Дараагийн шатанд шалгарахийн тулд бидэнд  заавал ялалт хэрэгтэй байсан болохоор  олон аюултай алхам хийсэн, харин тэдний байдал огт эсрэгээрээ учир ерөнхийдөө хянамгай, хашир тоглолоо”

“Ерөнхийдөө хуурай тэнцсэн нь бараг шударга зүйл боллоо доо, Юве биднээс олон боломж гаргаж байхад бид 5, 6 удаа л цохисон байх”

“Яахав манай одоогийн форм бол дажгүй л байгаа, ганцхан эцсийн мөчид төгсгөл хийх дээр л алдаа гараад байна. Үүнд л би жаахан гонсгор байна, гэхдээ сэтгэлээр уналгүй цаашаа өрсөлдөхийг хичээнэ ээ” гэжээ.

БАТЭ 0 : 1 Реал Мадрид (Раул 7′)

Реал Мадрид : Касиллас, Торрес, Рамос, Пепер, Хайнц, Гаго, Гути (Ван дер Ваарт 78′), Шнайдер, Дренте, Раул (Хави Гарсиа 85′), Савиола (Буена 88′)

Өмнө нь Зенит – Юве тэнцчихсэн учир Беларусын багийг ялбал дараагийн шатанд шалгарна гэдгээ Мадридууд мэдэж байсан. Энэ үүргээ ч амжилттай биелүүллээ. Тоглолтын 7 дахь минутад домогт №7 Раул Гонзалез багаа ялалтад хөтөлсөн ба Аваргуудын лигийн бүх цаг үеийн мэргэн бууч гэдгээ дахин нотоллоо. БАТЭ-н хамгаалагчдын алдааг ашигласан энэ гоолын дараа Реалд дахин тоог холдуулах боломж байсан ч өөрсдөө түүнийгээ ашиглаж чадсангүй. Саяхан багийн ерөнхийлөгч Роман Калдерон багийнхнаа 5 тоглолт дараалан ялбал 2.5 сая еврогоор шагнахаа мэдэгдсэн билээ. Одоо тэднийг Хетафе, Севилья багууд хүлээж байна.

Раул : “Маш чухал ялалт байлаа, одоо сүүлийн тоглолтод санаа амар орж болох нь”
“3 өдрийн дотор 2 ялалт гэдэг болж л байна, гэхдээ бид тоглолтын түвшингээ дээшлүүлэх хэрэгтэй байна тэгж байж л аваргын төлөө өрсөлдөж чадна” гэжээ.

Баг	Т	Хо	Тэ	Хд	Х/Г	А/Г	Б/х	Оноо
Ювентус	5	3	2	0	7	3	+4	11
Реал Мадрид	5	3	0	2	6	5	+1	9
Зенит	5	1	2	2	4	4	0	5
БАТЭ	5	0	2	3	3	8	−5	2

Мэргэн буучид

Димитар Бербатов
Алессандро Дель Пиеро
Стивен Жеррард
Лионель Месси
Карим Бензема (4 гоол)