Германы Дрезден хотод зохион явагдсан Шатрын 38 дахь Олимпиад Армен, Гүржийн шигшээ багуудын ялалтаар өндөрлөлөө. Өнгөрсөн Олимпиадын аварга Армений шатарчид шийдвэрлэх 11 дэх тойрогт Хятадын багийг 2,5-1,5-ын харьцаатай буулган авсан ба тэмцээнийг 9 ялалт, 1 тэнцээ, 1 хожигдолтой дуусгаснаар дэлхийн шилдгээр хоёр дахь удаагаа дараалан шалгарсан байна. Удаах байранд Израиль, АНУ-ын багууд орлоо. Дэлхийн чансааг тэргүүлэгч ОХУ-ын шигшээ зөвхөн 5-р байр эзэлж, түүхэндээ хоёр дахь удаагаа ямар ч медальгүй хоцорсон нь тэмцээний гол дуулианаар тодорч байна. Монголын шигшээ багийн хувьд сүүлийн тулаанаа Катарын эсрэг хийж, 2-2-ын харьцаатай тэнцсэнээр нийлбэр дүнгээр 73-р байр эзэлж, хоёр жилийн өмнөх амжилтаа 14 байраар буурууллаа. Манайхан 5 хожиж, 1 тэнцэж, 5 хожигдсон бөгөөд шилдгээр 6 оноо авсан их мастер Хатанбаатар шалгарсан байна.

Харин монголын эмэгтэй шигшээ өмнөх Олимпиадын амжилтаа эрс ахиулж чадлаа. их Мастер Мөнгөнтуул тэргүүтэй манай баг тэмцээний сүүлийн өдөр Болгарын хүчтэй багтай тэнцсэнээр 6 ялалт, 2 тэнцээ, 3 ялагдалтай 17-р байранд орсон байна. Хоёр жилийн өмнө тэд 34-р байр эзэлж байжээ. Нэгдүгээр ширээн дээр өрсөлдсөн Мөнгөнтуул ганцхан хожигдолтой 10-аас 7 оноо авсан бол Мөнхчулуун 9-өөс 7 оноо авсан амжилт үзүүллээ. Эмэгтэйчүүдийн Олимпиадын аваргаар Гүржийн баг тодорсон байна. Кавказчууд шийдвэрлэх тулаанд Сербийг 3-1-ийн харьцаатай буулган авсан бол өмнөх тойргийн дараа тэргүүлж байсан Польшийн бүсгүйчүүд Украинд ялагдсанаар медальгүй хоцорлоо. 2, 3-р байрыг Украин, АНУ-ын багууд эзэлсэн байна. Шатрын ээлжит 39 дэх Олимпиад хоёр жилийн дараа манай хойд хөрш улсын Ханты Мансиийск хотод болно.