“Алтан бөмбөг”-ийн голлох нэр дэвшигчдийг танилцуулъя. Доорх тоглогчид бол энэ оны Европын төдийгүй дэлхийн хөлбөмбөгийн гялалзсан одод нь байлаа.

АНДРЕЙ АРШАВИН (Зенит, ОХУ)

Оросын од Аршавин Евро-2008-ын эхний 2 тоглолтыг торгуулийн улмаас өнжсөн хэдий ч хэсгийнхээ сүүлийн тоглолт болон шөвгийн 8-ын тоглолтонд маш сайн тоглож, Гус Хиддинкийн удирдсан багийг хагас шигшээд хүрэхэд гол үүрэг гүйцэтгэсэн юм. Ялангуяа Голландын эсрэг хийсэн тоглолт нь түүнийг дэлхий дахинд бүрэн таниулж, оддын зэрэгт аваачсан гэхэд болно. Аршавин зөвхөн Еврогоор гялалзаад зогсохгүй Зенит багийнхаа хамтаар энэ оны УЕФА-ын цомын аварга болсон билээ

ИКЕР КАСИЛЛЬЯС (Реал Мадрид, Испани)

Энэ он Икерийн хувьд амжилт ялалтаар баялаг байлаа. Эхлээд Реал Мадрид багтай Испаний Ла Лигийн аваргаар 2 дахь улиралдаа дараалан тодорсон бол 6-р сард Испаний шигшээ багаа ахлан Европын аварга шалгаруулах тэмцээнд амжилттай оролцон түрүүлсэн юм. 27 настай Касилльяс тэрхүү тэмцээний билэгдлийн шигшээ болон  FIFPro World XI -т нэрлэгдсэн юм.

КРИШТИАНУ РОНАЛДУ (Манчестер Юнайтед, Португал)

Түүний талаар танилцуулсан.

САМУЭЛЬ ЭТО’O (Барселона, Камерун)

Это’О 2 сард болсон Африкын цомд 5 гоол оруулан уг тэмцээний мэргэн буучаар тодорсон төдийгүй Африкын цомын түүхэнд хамгийн олон гоол хийсэн тоглогч болсон юм. Харамсалтай нь түүний баг шигшээ тоглолтонд Ганад хожигдсон. Харин Барселона клубтэйгээ Аваргуудын лигийн хагас шигшээд хүрснээс өөр амжилт үзүүлээгүй. Түүний Ла Лигад хийсэн 16 гоол нь Барсаг хүснэгтийн 3-р байранд бичигдэхэд л тусалсан байна.

ЧЕСК ФАБРЕГАС (Арсенал, Испани)

Испани залуугийн хувьд энэ жил бас нэгэн сайхан он боллоо. Тэрээр Европын аварга шалгаруулах тэмцээний хагас шигшээ болон шигшээ тоглолтонд гэмтэлтэй Давид Виллаг орлон маш сайн тоглосон юм. Клубтээ бол лидерийн хэмжээнд хүрч, өнгөрсөн улирлын эхэн үеийн Арсеналын супер тоглолтын гол хүн нь байлаа. Мөн хавар Аваргуудын лигийн шөвгийн 16-д аварга цолоо хамгаалах гэж байсан Миланы хаалганд гоол хийн, багтаа хожил бэлэглэж байв. 21 настай Фабрегас энэ улирлаас Арсеналын ахлагч болоод байна.

ФЕРНАНДО ТОРРЕС (Ливерпуль, Испани)

Торрес Премьер лигт эхний улиралдаа л супер тоглолт үзүүлэв. 2007-2008 оны улиралд ПЛ-т 24 гоол оруулсан нь Английн биш тоглогч ПЛ-т тоглосон эхний улиралдаа хамгийн олон гоол хийсэн амжилт болжээ. Мөн Аваргуудын лигт 6 гоол хийсэн, Европын аварга шалгаруулах тэмцээний шигшээ тоглолтын хожлын гоолыг хийсэн, Европын аварга болсон гээд багийн болоод хувийн амжилт аль аль нь сайн байлаа.

ЧАВИ (Барселона, Испани)

Европын аварга шалгаруулах тэмцээний шилдэг тоглогч. Өнөөдрийн байдлаар дэлхийн шилдэг төвийн хагас хамгаалагч нарын нэг. Шигшээ баг болон Барселона клубынхээ гол хөдөлгөгч хүч, найруулагч нь. Барса таагүй улирлыг үдсэн ч шинэ улирал эхэлснээс хойш Барса Европт гайхалтай тоглолтоороо шагшигдаж байна.

LIONEL MESSI (Barcelona and Argentina)

Барселонагийн эрдэнэс “Алтан бөмбөг”-ийн хүчтэй өрсөлдөгч. Клуб нь амжилт гаргаагүй ч шигшээ багтайгаа олимпийн их наадмын аварга болсон. Долоо хоног бүр бид түүний бахадмаар тоглолтыг үзэн биширч байгаа гэхэд хилсдэхгүй. Энэ жилдээ хувийн шагнал авахгүй байж болох юм, гэхдээ ирэх улирлуудад нэг биш нэлээн хэдэн удаа авах нь тодорхой.