Уилльям Галлас 2006 онд Эшли Коулаар солигдон Челсигээс Арсеналд ирж, 4 жилийн гэрээ байгуулж байлаа.

2006 оны 9 сарын 9-нд Арсенал дахь анхны тоглолтоо Мидлсброгийн эсрэг хийж, 1:1-ээр тэнцэж байсан бол 14 хоногийн дараа Шеффилдийн эсрэг Арсеналын жерситэй анхны гоолоо хийж байв.

Түүнээс хойш тэрээр Арсеналын хамгаалалтын гол цөм болж, залуу тоглогчид бүхий багийнхаа туршлагатай тоглогч нь байлаа. Жилийн дараа Галлас Арсеналын ахлагч болсон. Коло Туре түүний орлогч.

Харин одоо их зүйл өөрчлөгдөж. Галлас Арсеналын ахлагч байхаа больж, багтаа ч нэр хүндгүй нэгэн болжээ. Арсенал энэ улиралд хэдийгээр Манчестер Юнайтед, Челси гэсэн 2 акулыг хожиж чадсан ч Халл, Сток, Фулхэм зэрэг сонин багуудад хожигдсон, одоогоор хүснэгтийн 4-р байранд дэнжигнэж байна.

Арсенал талбай дээрээ Астон Виллад 2:0-ээр хожигдсоны дараа хувцас солих өрөөнд Галлас багийнхантайгаа ёс бус харьцсанаас болж Венгерт ахлагчийн туузаа хураалгасан. Тоглолт ч өнжсөн. Одоо харин Арсеналаас явахыг хүсч байгаа тухай мэдээ цацагдаж эхэлж байна.

Түүнийг эртнээс сонирхож байсан Италийн жиант АС Милан энэ өвлийн наймааны цонх нээгдэхээр Галласыг багтаа элсүүлэхийг хүсч байгаа аж. Галлас ч дургүйцэхгүй байгаа юм байх. Миланаас гадна түүнийг Францын аль нэг багт очиж магадгүй гэсэн мэдээллүүд ч гарсан. Хэдий Галлас Арсеналтай 2010 он хүртэл гэрээтэй ч түүний Арсенал дахь амьдрал нь өндөрлөх шатандаа орж байгаа  бололтой.