ОХУ-ын нийслэл Москва хотноо Олон улсын боксын холбоо AIBA-гаас зохион байгуулж байгаа дэлхийн цомын анхны тэмцээний ¼ шигшээ тулаануудын дараах байдлаар манай хоёр тамирчны нэг нь медалийн болзол хангалаа. 64 кг-ийн жинд өрсөлдөж байгаа олон улсын хэмжээний мастер Уранчимэгийн Мөнх-Эрдэнэ Тажикийн боксчин Мадади Нагзибековыг 18-3-ын харьцаатай илт давуу ялснаар энэ нэр хүндтэй тэмцээний хагас шигшээд шалгарсан байна. Тэрээр шигшээд шалгарахын төлөө Францын Алексис Вастинтай тулалдана. Энэ хоёр боксчин 4 сарын өмнө Бээжингийн Олимпийн шөвгийн наймд учраа таарч, Мөнх-Эрдэнэ харамсалтай ялагдаж, медальгүй хоцорч байсан. Энэ удаад манай тамирчинд хариугаа авах боломж олдож байна. Харин 48 кг-ийн жинд өрсөлдсөн манай гавъяат тамирчин П.Сэрдамбын хувьд энэ тэмцээн амжилтгүй байлаа. Гэмтлээ бүрэн эдгээж амжаагүй байгаа Бээжингийн Олимпийн мөнгөн медальт маань Казахстаны Биржан Жакыповд 13-5-ын харьцаатай оноогоор ялагдсан байна. Сануулахад, Жакыпов Бээжингийн наадмын ¼ шигшээд ирээдүйн Олимпийн аварга Зу Шиминтэй учраа таарч, илт буруу шүүлтийн үр дүнд 9-4-өөр хожигдож байсан юм. Дэлхийн цомын анхны тэмцээнд манай гавъяат тамирчин, Олимпийн аварга Бадар-Ууган уригдсан хэдий ч тэрээр гэмтлийн улмаас Москвад тулалдаж чадсангүй.