Олимпийн аварга Н.Түвшинбаяр өвдөгний гэмтлээ эмчлүүлэхээр АНУ-ыг зориод удаж буй билээ. Америкт очсон эхний үедээ соёл, боловсрол, спорт, бизнесийн хүрээний олон нийтийн арга хэмжээнд оролцож байсан тэрбээр өнгөрөгч даваа гаригт (XII.8) Баффалод баруун өвдөгтөө хагалгаа хийлгэсэн байна.

УИХ, Засгийн газрын гишүүн, МЖБХ-ны ерөнхийлөгч Х.Баттулгын найз, “Ниагарагийн хөгжлийн сан”-гийн дэд ерөнхийлөгч Рожер Тревино болон АНУ дахь Монголын хүндэт консул Кармен Кэбелл нар Баффало хотод байдаг Нью-Йорк мужийн их сургуулийн Спортын анагаах ухааны салбар сургуулийн эмч Жон Марцо, тус мужийн Спортын эмнэлгийн дурангийн хагалгааны тасгийн эмч Энди Каппучино нартай холбож өгч туслан, энэхүү эмчилгээ амжилттай болох үндсийг тавьжээ.

Ингээд дээр дурдсан эмч нар үзлэг хийж рентген зураг авсныхаа дараа баруун өвдөгний зөөлөн эд нь идэгдээд, яс нь хоорондоо хавиралдан, идээлж эхэлснийг хэлэн, эмчлүүлэгчийг явалгүй, хөдөлгөөнгүй байхыг захисан байна. Үүний хариуд МЖБХ-ны Боловсрол хариуцсан захирал Б.Пагва Н.Түвшинбаярыг жүдо бөх барилддаг, бүр Бээжингийн олимпод аваргалсан  гэдгийг нь хэлэхэд эмч нар итгэхгүй байсан гэнэ.

Н.Түвшинбаяр мэс заслын дараа 14 хоног эмчийн хяналтад байх бөгөөд Монголд ирэх хугацаагаа нарийн тогтоогүй аж. “Гэрийнхэнтэйгээ байнга ярьж, холбоотой байгаа ч их санаж байна. Хурдхан нутагтаа очмоор байна” гэж тэр өгүүлсэн гэнэ. Мөн тэрбээр эмчилгээний зардалд багагүй мөнгө гарч байгаа ч энэ бүгдийг зохицуулж зардлыг дааж байгаа хүмүүс, мэс засал хийсэн эмч нар, тэдэнтэй холбож өгсөн ачтануудад талархаж буйгаа илэрхийлсэн байна.

Одоо Н.Түвшинбаяр, Б.Пагва нар Рожер Тревиногийн гэрт амьдарч буй аж.