Нью-Йорк Никс багийн довтлогч Эл Харрингтон, Сан-Антионо Спэрс багийн довтлогч Тим Данкан нар өнгөрсөн долоо хоногийн шилдэг тоглогчдоор нэрлэгдлээ.

Харрингтон Дорнод бүсийн тоглогчид дундаас хамгийн их буюу 33.3 оноог дундчилж, 56.5 хувийн оновчтой шидэлт гүйцэтгэсэн байна. Мөн 8.3 самбараас авалт, 2.6 оновчтой дамжуулалт, 1.6 бөмбөг таслалт хийжээ. Никс өнгөрсөн долоо хоногт 2 хожиж, 1 хожигдсон байна. Түүнтэй Кливлендийн ЛеБрон Жеймс, Мо Уилльямс, Детройтын Рип Хэмилтон, Орландогийн Рашард Льюис нар энэ долоо хоногийн бүсийнхээ шилдгийн төлөө өрсөлдсөн байна.

Харин Спэрс өнгөрсөн долоо хоногт 4 хожсон бөгөөд Тим Данкан багаа тэргүүлэн 22.0 оноо, 12.5 самбараас авалт авч байжээ.  Лигт 11 дэх жилдээ тоглож байгаа супер од 12 сарын 9-нд Далласыг 2 нэмэлт цагт 133:126-аар хожсон тоглолтонд 32 оноо, 14 самбараас авалт хийсэн байна. Спэрс улирлыг 1-4 амжилтаар эхэлсэн ч яван чангарч, түүнээс хойшхи 18 тоглолтынхоо 14-т нь хожоод байна. Өрнөд бүсэд өнгөрсөн долоо хоногт Данканаас гадна Далласын Дирк Новицки, Денверийн Кармело Энтони, Клипперсийн Зак Рэндольф, Мемфисийн Руди Гэй нар сайн тоглоцгоожээ.