Өнгөрөгч амралтын өдөр Дорноговь аймгийн Сайншанд суманд “Сайншанд мастер кросс-2008” автомашины бартаат замын уралдаан амжилттай болж өндөрлөлөө. Худалдаа үйлчилгээний “Төмөр транс” компани, Дорноговь аймгийн Засаг даргын тамгын газартай хамтран зохион байгуулсан тус уралдаан шагнал өндөртэй байв. Тэмцээнд нийт 17 төмөр хүлэгтэн оролцож эр зориг, авхаалж самбаагаа сорин өрсөлдсөн.

Тамирчид гурван хэсэгт хуваагдсан ба нэгдүгээр хэсгийг ОУХМ Д.Болдбаатар (Морьт-хангай) тэргүүлж, нутгийн хүү авто спорт сонирхогч олондоо “Мөнгөн Уртаа” гэж алдаршсан ОУХМ Н.Уртнасан (Цагаан шонхор), залуу тамирчин Л.Ариунболд (Шинэ барилга) нар удаалж шигшээ гараанд уралдах эрх авсан. Хоёрдугаар хэсэгт ОУХМ Ж.Пүрэвсүрэн манлайлж, мотоциклын ОУХМ Б.Батцэнгэл (NTI), залуу тамирчин Д.Мөнх-Оргил (Эвт) нар удаалж, эцсийн шатанд шалгарсан юм. Харин гуравдугаар хэсгээс “Алтайн бугат” компанийн тамирчид спортын мастер Ж.Төрмөнх, Ш.Гомбодорж, ахмад мастер Д.Батсайхан (Хилийн цэрэг) нар финалд шалгарсан байна.

Шийдвэрлэх гараанд ОУХМ Д.Болдбаатарыг гүйцэх тамирчин гараагүй бөгөөд бусдаасаа хол тасархай түрүүлэв. Түүнийг “Honda CRV” автомашинаар байлсан байна. Удаах байрт спортын мастер Ж.Төрмөнх, Ш.Гомбодорж нар орж “Иж планета”, цасны мотоциклоор шагнуулсан. Мөн уламжлал ёсоор айргийн тавд хурдалсан төмөр хүлэгтнүүдэд мөнгөн шагнал олгожээ. Дөрөвдүгээрт Н.Уртнасан орсон бол тавд Д.Батсайхан шалгарсан байна.

Тус тэмцээнд түрүүлсэн Д.Болдбаатар өмнө нь 2005 онд Сайншандад  уралдаж аваргалж байжээ. Түүний гол өрсөлдөгч Ш.Гомбодорж энэ удаад гуравдугаарт хурдалсан. Харин Сэлэнгэ аймгийн тамирчин Д.Батсайхан сүүлийн гурван ч тэмцээнд дараалан айрагдаж байна.