2018 оны хөлбөмбөгийн ДАШТ-ийг зохион байгуулах хүсэлтэй орны тоо наймд хүрээд байна. Хамгийн сүүлд Бельги/Голланд болон Испани/Португал улсууд хамтран нэр дэвших болсноо мэдэгдсэн юм. 2000 оны Еврог амжилттай “эх барьж” авсан Бельги/Голланд 2018 онд чадахгүй бол 2022 оны ДАШТ-ийг зохион байгуулахын төлөө дахин өрсөлдөх аж.

Энэ үед FIFA-гийн ерөнхийлөгч Зепп Блаттер нэгэн ярилцлагадаа Английн боломж бусдаасаа хавьгүй илүү хэмээн ярьжээ. “Англи бол хамгийн хүчтэй өрсөлдөгч. Энэ улсад хөлбөмбөгийн баялаг уламжлал бий. Бусад нэр дэвшигчдийн тухайд Испани/Португалын шанс арай илүү байж магадгүй” хэмээн эрхэм ерөнхийлөгч өгүүлсэн байна. 10 жилийн дараа болох ДАШТ-ийг зохион байгуулахын төлөө эдгээрээс гадна Австрали, ОХУ, Катар улс нэр дэвшээд байгаа юм.