Монголд жүдо, самбо бөхийг үүсгэн хөгжүүлэгч, гавъяат дасгалжуулагч Ч.Машбат агсны нэрэмжит тэмцээн Монгол бөхийн өргөөнд хоёр өдөр үргэлжилж өчигдөр өндөрлөлөө. Ч.Машбат гавъяатын хувьд 1960-аад оны дундуур бөхийн шинэ төрлийг Монголд тийн хөгжүүлсэн бол 1988 онд эмэгтэйчүүдийн жүдогийн эхлэлийг тавьж байв.

Урьд нь эмэгтэй жүдог хөгжүүлэх оролдлого хэд хэд гарсан ч төр засгийн зүгээс ёс зүйд харш хэмээн хориглодог байж. Харин 1988 онд эрхийг нь нээлттэй болгосноор Ч.Машбат анхны секцийг байгуулан хичээллүүлж байжээ. Тиймээс Монголд эмэгтэйчүүд жүдогоор барилдаж эхэлсний 20 жилийн ой энэ онд тохиож буйг онцлон, үүний эхлэлийг тавьсан гавъяатын нэрэмжит тэмцээнийг зохион байгуулсан нь энэ юм.

Монголд эмэгтэйчүүдийн жүдо бөх хөгжсөн 20 жилийн түүхийг өгүүлэх нэгэн эрхэм шавь багшийнхаа нэрэмжит тэмцээний үеэр тамирчны замналаа өндөрлөлөө. “Каир-2005” жүдо бөхийн ДАШТ-ий хүрэл медальт, самбо бөхийн дэлхийн таван удаагийн аварга, Монгол Улсын гавъяат тамирчин Хишигбатын Эрдэнэт-Од энэ өдөр зодог тайлах ёслолоо хийв.

20 жилийн турш тогтвортой амжилт үзүүлнэ гэдэг хэн хүнд, ялангуяа бүсгүй хүний хувьд хэцүү. Харин 33 настай Хишигбатын Эрдэнэт-Од Монголын спортын тодоос тод гялалзах эрдэнэт од нь болж, хэд хэдэн үеийн тамирчидтай мөр зэрэгцэн явсан билээ. Тамирчны хувиар Монголын спортод тодоор тэмдэглэгдэх амжилтыг үзүүлсэн гавъяатдаа дасгалжуулагчийн албандаа хүчин зүтгэж өөр шигээ олон шилдэг жүдочийг бэлтгэн гаргахыг хүсье.