Америкчуудын хамгийн том баяр гэж хэлж болохоор 12 сарын 25нд Исүсийн төрсөн өдөр буюу Зул сарын баяраар үндэсний сагсан бөмбөгийн холбооны улиралын шилдэг тоглолтууд явагдаж өнгөрлөө. 

Юуны өмнө ирэх жил болох бүх ододын тоглолтын цагиранд довтлох тэмцээнд оролцогчид өнөөдөр тодорчээ. Өнгөрсөн жил өнгөтөй наадаж тус тэмцээний аваргаар тодорсон “Суперман” Дуэйт Ховард, мөн тус тэмцээний аваргаар тодорч байсан Нэйт Робинсон, мөн Мэмфисийн залуу од Руйди Гэй нар энэ хүү тэмцээнд дахин оролцох нь тодорхой болжээ. 

Харин үлдсэн нэг тоглогчыг www.nba.com оор авах үзэгчдийн саналаар шийдэх гэнэ. Энэхүү санал асуулганд Милвайкеегийн шинэ довтлогч Жо Александер, Портландын хамгаалагч Спайн гаралтай Руди Фернандез, Оклахомагын шинэ тоглогч Расселл Уэйстбрүүк нар оролцож байгаа гэнэ.

Нью Орленс 68 – 88 Орландо

Зул сарын баяраар Орландод болсон уг тоглолтонд үзэгчидийн ихэнх нь Суперманы бэлэг тэмдэгт бүхий цэнхэр өнгийн подволкоор гоёж Дуэйт Ховардад бэлэг барив. Энэхүү тоглолт их эрт шийдэгдэж зөвхөн эхний хагаст гэхэд Орландо 61-31 буюу бүхэл 30 оноогоор тасарчихсан байлаа. Нэгэнт тоглолт ийнхүү ойлгомжтой болсоноор тоглолтонд төдий л өрсөлдөөн гарсангүй. Сүүлийн хагасыг хоёр баг бэнчүүдээ туршсан тоглолт хийв.

Нью Орленсийн залуу лидер холбогч Крис Пол, лигийг бөмбөг таслалтын дундажаар тэргүүлж байгаа/3.7/ тэрбээр өнөөдөр талбайд бөмбөг хулгайлж чадаагүй бөгөөд ингэсэнээр түүний тогтоосон 108 дараалсан тоглолтонд бөмбөг хулгайлсан рекорд таслагдав. 

Сан Антонио 91 – 90 Финикс

Сүүлийн хэдэн жилд өрсөлдсөөр ирсэн түвшин ойролцоо хоёр багын хооронд гал гарсан тоглолт болж, эцсийн мөчид Ражор Масоны хийсэн гурвийн зайн оновчтой шидэлтээр тоглолт өндөрлөв. Тим Данкан 25 оноо, 17 самбар хийж багаа тэргүүлсэн бол Тони Паркер 27 оноо, 8 дамжуулалт, 4 булаалт хийв. Финиксээс Шак 23 оноо, 12 самбар хийсэн ч нөөц тоглогчдоос Барбоса л 2 оноо авчирсан байна. Улирал эхлэхэд ПОын гадна үлдэж байсан Сан Антониочууд өнөөдөр чухал ялалтаа авснаар сүүлийн дөрвөн тоглолт дараалж, энэ улиралын 19 дахь ялалтаа байгуулж бүсдээ Лос Анжлес ийн ард хоёрт явж байна. 

Сонирхуулахад Стив Нэш өнөөдөр 8 оновчтой дамжуулалт өгсөнөөр 7000 мянган дамжуулалт хийсэн 13 дахь хүн боллоо.

Бостон 83 – 92 Лос Анжлес

Өнгөрсөн жилийн финалд таарсан хоёр баг өнөөдөр ахиж тоглоллоо.  Өнгөрсөн жилийн аваргууд болох Бостон Селтикс өнөөдрийг хүртэл нэг ч хожигдолгүй дараалж 19 ялаад байсан билээ. Тэгвэл Коби, Гасол нарын гайхалтай тоглолтуудын ачаар нутагтаа Лос Анжлес хожиж, цувралд цэг тавьжээ. Лос Анжлес өнөөдөр хожсоноор ахлах дасгалжуулагч Фил Жаксон 1000 тоглолтонд ялалт байгуулсан түүхэн зургаа дахь дасгалжуулагч болов. 17 жил НБАд баг удирдсан алдарт дасгалжуулагч маань Чикаго Буллс, Лос Анжлес Лэйкерс гэх мэт багууд удирдахдаа 1000-423 гэсэн амжилт үзүүлсэн байна. 

Тоглолтын хувьд хэдийгээр Бостоны одууд болох Пол Пирс 20 оноо, 10 самбар, Кевин Гарнэтт 22 оноо, 9 самбар хийж үүргээ хангалттай биелүүлсэн ч бусад нь тун хангалтгүй тоглов. Ялангуяа Рэй Аллен эхний гурвын шидэлтээ оновчтой болгосоноос хойш гурваас 11 шидэж 2ыг нь оновчтой болгож дөнгөж 14 оноо авчээ. Бусад нь 10 ч хүрэхгүй оноо авчээ.

Вашингтон 89 – Кливланд 93

Хаан Жэймсийн шилдэг цэргүүд энэ улиралд өөрийн талбай дээрээ нийт 15 тоглосоноос ч нэг ч хожигдоогүй амжилтаа өнөөдөр хадгалж үлдлээ. Лигийн муу амжилттай багуудын тоонд орж байгаа нийслэлчүүд болох Вашингтончууд чамгүй эсэргүүцэл үзүүлж хожиж явсан ч сүүлийн хэдхэн минутанд 11 оноо дараалж алдаад өөрсдөө нэг ч бөмбөг цагиранд оруулж чадаагүйгээр хожигдлоо. Ялангуяа дөрвөн онооны зөрүүтэй хожигдож байхдаа Мо.Уэйллимс гурваас хийж, дээр нь Андерсон Варежао чөлөөт хоёр шидэлтээ оновчтой болгосоноор Морин Цэргүүд тоглолтыг тэргүүлж эхэлсэн юм. Вашингтонд энэ жилээс эхэлж тоглох болсон ахмад холбогч Майк Жэймс улиралын шилдэг амжилтаа үзүүлж 26 оноо, Антавн Жэймисон 28 оноо тус бүр аваад ч тус нэмэр болсонгүй.

Даллас 102 – 94 Портланд

Далласчууд Дирк Новицкигийн 30 онооны ачаар сүүлийн үед гайхалтай тоглож байгаа Портландын залуусыг нутагт нь найман онооны зөрүүтэй хожив. Далласын довтлогч Жош Ховард гуравдугаар үед эсрэг багын төвийн тоглогч Жоел Прузибиллаг бүдүүлэгээр зогсоонд нь шүүгч текникийн алдаагаар торгосон боловч шүүгчийн өөдөөс буруу үг хэлсэн үү, юутай ч тун удалгүй хоёр дахь текникийн алдааг авч тоглолтыг орхисон. Мөн Далласын довтлогч Дирк Новицки,  дасгалжуулагч Рик Карсле нар текникийн алдаагаар торгуулсан байна. Хэдхэн хоногын өмнө 52 оноо авч гайхалтай тоглосон Брандон Рой өнөөдөр эхний гурван үед 22 оноо авсан ч сүүлийн үед ганц ч оноо авч чадаагүйгээр багтаа хожигдол бэлэглвээ.

Даллас 2003 онд  Зул сарын баяраар Сакраметогын эсрэг тоглож хожсоноос хойш анх удаагаа Зул сарын баяраар тоглож ийнхүү хожил авчээ.