Испаний Ла Лигийн мэргэн буучдын жагсаалтыг тэргүүлж байгаа Барселонагийн довтлогч Самуэль Это`Ог Италийн Сери А-г тэргүүлж байгаа Интер Милан сонирхсон тухай мэдээлэл гарчээ.

Каталоны өдөр тутмын Спорт сонины мэдээлснээр Интерийнхний листийн толгойд Камерун довтлогч явж байгаа бөгөөд түүнээс гадна Диего Милито, Дидье Дрогба, Карлос Тевез болон Майкл Оуэн нар байгаа гэнэ.

Самуэльд Барсагийн зүгээс шинэ гэрээ санал болгохоор зэхэж байгаа бөгөөд түүний одоогийн гэрээ 2010 оны зун дуусах юм.

Өвлийн солилцооны наймааны цонх нээгдсэн энэ өдрүүдэд Германы Бавари Мюнхен баг Хамбургын Хорват довтлогч Ивица Оличийг багтаа элсүүлжээ. Гэхдээ Олич энэ улирал дууссаны дараа Баваригийн төлөө тоглох юм байна.

Манчестер Ситигийн энэ өвлийн анхны наймаа нь Уэйн Брижийг Челсигээс авсан наймаа боллоо. Хэдийгээр Бриж сайн тоглогч боловч Челсид хангалттай олон тоглолт хийгээгүй. Харин одоо Манчестер Ситигийн үндсэн тоглогч нарын нэг болох биз ээ. Ситигийн баячууд мөн Блэкбэрний Санта Круз, Вест Хэмийн Крэйг Белламми, Скот Паркер нарыг худалдан авахаар нийт 32 сая фунт бэлдээд байгаа сурагтай.

Тоттенхэмийн босс Харри Реднапп Портсмутаас Жермайн Дефог эргүүлэн авчрахаар зэхэж байгаа бөгөөд 29 сая америк долларын санал тавиад байгаа аж.