Товч танилцуулга

Нэр: Рикарду Андраде Куарэжма Бернардо

Байрлал: Вингэр

Төрсөн газар: Лиссабон, Португал

Төрсөн огноо: 1983-9-26

Өндөр: 173 см

Жин: 67 кг

Цыган гаралт хөлбөмбөгчдөөс хамгийн алдартай нь магадгүй Португалийн авъяаслаг залуу оддын нэг Рикарду Куарэжма юм.

Олноо “мустанг” нэрээрээ алдаршсан Куарэжмаг мэргэжилтнүүд маш авъяаслаг, асар хурдтай, бие даасан зоримог шийдвэрүүд гаргадаг онцгой чадварлаг тоглогч гэдэг бөгөөд ногоон талбайд үзүүлж буй гайхалтай тоглолтууд, өрсөлдөгч нь тааварлашгүй гайхам хөдөлгөөнүүд, ид шидийн гэмээр гоёмсог дамжуулалтууд, цохилтын онцгой хэв маягаар (хөлийн гадар хэсгээрх) нь “Харри Поттер” хэмээн хочлох болжээ.

Түүний тоглолтын хэв маягийг хурд, гоёмсог байдал, эрч хүч хэмээн тодорхойлж болох бөгөөд Куарэжма талбай дээр “чөлөөт тоглогчоор” тоглодог.

Куарэжмаг нутаг нэгт анд Роналдутай харьцуулах нь элбэг. Учир нь тэд хоюул Спортингийн академийн бүтээгдэхүүнүүд бөгөөд хурд, техник, тоглолтын хэв маягаараа маш ойролцоо байдаг. Куарэжма чөлөөт цохилт, хөндлөн дамжуулалт, алсын цохилт хийхдээ “тривела” буюу хөлийн гадар хэсгээр бөмбөгийг эргүүлэгтэйгээр цохидог өвөрмөц техникийг маш сайн эзэмшсэн байдаг.

Авъяас билгийн дундаршгүй эх булаг Спортингийн академид суралцаж, 2000-2001 оны улирал мэргэжлийн хөлбөмбөгчний замналаа эхэлжээ. Уг улирал Спортингийн Б багт 15 тоглолтод оролцов. Дараагийн улирал нь клубын менежер Ласло Белени нэгдүгээр багтаа Куарэжмаг багтаасан бөгөөд 28 тоглолтод 3 гоал оруулж, улмаар баг нь лигийн аварга болон цомыг хамтад нь хүртэв. 2002-2003 оны улиралд Спортинг лигийн гуравдугаар байранд орж, Куарэжма ч багаа солихоор шийдэв.

Барселон клуб зургаан сая еврог Спортингд төлснөөр Куарэжма Каталаны нэр төрийн төлөө зүтгэхээр болов. Гэвч Камп Ноуд идээшсэнгүй. Эхний улиралдаа 10 тоглолтод гараанд гарч, 11 тоглолтын сэлгээний тамирчин байв. Энэ хугацаанд ганцхан гоал оруулсан бөгөөд лигийн хамгийн сүүлийн тоглолтод оролцож байхдаа баруун хөлөндөө хүндэвтэр гэмтэл авч, 21 хүртлэх настны дэлхийн аварга шалгаруулах тэмцээнийг алгасахаас өөр аргагүйд хүрсэн билээ.

Евро-2004 тэмцээний үед Франк Райкаардын удирдсан Барсад тоглохыг хүсэхгүй байгаагаа илэрхийлсэн нь олон багуудын сонирхлыг татаж эхэлсэн байна.

Порту клубээс Декуг сонирхож байсан Барса 2004 оны зун нэгэнт сэтгэлгүй болсон Куарэжма дээр 6 сая евро нэмэн солилцохыг санал болгов. Энэ наймаа хэн хэндээ ашигтай байсан нь бидний нүдэнд ил байгаа билээ.

Нутагтаа ирсэн Куарэжма маш сайн тоглолтыг үзүүлж, 2004 оны УЕФА супер цомд дебют гоалоо оруулж, Португалийн супер цомд Бенфикагийн хаалганд шийдвэрлэх гоал оруулан ялалтыг өөрийн багт авчирсан билээ. 32 тоглолтод оролцож, 5 гоал оруулж, УЕФА-ын аваргуудын лигийн нокаут раундад оролцлоо. 2004 оны ФИФА Интерконтиненталь цомын финалд сэтгэл хөдлөм ширүүн тэмцэл өрнүүлэн алдар хүндийн оргилд хүрэв.

Портуд 4 улирлыг үдэхдээ 114 тоглолтод оролцож, 24 гоал оруулсан юм.

2008 оны есдүгээр сарын 1-нд буюу цонх хаагдах сүүлийн өдөр Интер Милан клубтэй Порту тохиролцоонд хүрэв. Куарэжмаг авсныхаа төлөө Интер өөрийн ирээдүйтэй залуу хагас хамгаалагч Пеле болон 18.6 сая евро өгсөн юм. Локарнотой хийсэн нөхөрсөг тоглолтод Интер дэх дебютээ хийж, зүүн вингэрээр тоглосон байна. Уг тоглолт 2-2 –оор өндөрлөж, шилдэг тоглогчоор нь Куарэжма тодров.

Гэвч тэрээр Сери А-д маш хязгаарлагдмал, цөөхөн тоглолтод оролцоод байна. Шигшээ багтаа өнөөдрийн байдлаар 24 тоглолтод оролцож, 3 гоал оруулжээ.

Куарэжма Интерийн гарааны 11 тоглогчид багтаж чадахгүй байгаа тухай Жозе Моуриньо:

“…Тэр бол авъяас билгийн эх булаг. Гэвч тэр Ибрахимовичтой адил багийн тоглолтод улам илүү уусах хэрэгтэй байна. Одоохондоо миний гарааны бүрэлдэхүүнд Куарэжма байхгүй. Тэр суралцах хэрэгтэй, үгүй бол тэр тоглохгүй. Би түүнийг миний тактикийн тоглолтод илүү зохицдог болно гэдэгт эргэлзэхгүй байна. Тэр бөмбөгийг хөлийнхөө гадар хэсгээр цохих дуртай. Хэрвээ та нар надаас хэсэг хугацааны дараа түүний талаар асуувал би тэс өөр Куарэжмагийн талаар ярьж суух болно гэдэгтээ итгэлтэй байна...”

хэмээсэн байдаг.

2008 оны “Golden Bin” буюу Сери А-ийн оны хамгийн муу тоглогчоор Куарэжма тодорсон байна. Гэхдээ энэ шагнал нь өөрийн боломжит чадвараа хамгийн муу харуулж байгаа тамирчинд олгогддог гэдгийг сануулах юун.

Гавъяа шагнал

• Шигшээ багийн хамтаар

UEFA European Under-17 Championship (1): 2000

• Клубын түвшинд

Intercontinental Cup (1): 2004

Portuguese League (4): 2001/02, 2005/06, 2006/07, 2007/08

Portuguese Cup (2): 2001/02, 2005/06

Portuguese SuperCup (3): 2002, 2004, 2006

• Хувийн амжилтаараа

Portuguese Footballer of the Year (2): 2005, 2006

Portuguese Golden Ball (1): 2007