Францын шигшээ болон Байерн Мюнхэн багийн хамгаалагч Вилли Санёл зодог тайллаа. Өдгөө 31 настай түүнд , гурваас дөрвөн  жил хөлбөмбөг тоглох цаг хугацаа байгаа ч , хэлж ирдэггүй хийсч ирдэг бэртэл гэмтлээс болж ийм шийдвэр гаргасан байна. Ногоон талбайн шилдэгүүдийн нэгэнд зүй ёсоор тооцогддог нэгэн эрхэм , ийнхүү ”шипигээ хананд өлгөлөө..”
Тэрээр  , 1995 онд Францын Сайнт Этьен багаас мэргэжлийн карьераа эхлүүлсэн бөгөөд тэндээ хоёр жил тоглоод Монако багт шилжсэн. ‘Улаан-цагаануудтай‘ хамт 3 жилийг үдэхдээ Санёл  Францын аваргаар нэгэнтээ тодорч байсан байна. Удалгүй 2000 онд Вилли хувь заяаныхаа их дуудлагыг хүлээн авч Германыг зорьсон юм. Эндээс түүний Байерн дэх урт удаан аян эхэлсэн.

Тэр жилээс өнөөг хүртэл Мюнхений багт зүтгэхдээ Вилли лигийн тэмцээнд 5 удаа (2001, 2003, 2005, 2006, 2008) , Аваргуудын лигт нэг удаа (2001) магнайлсан гайхалтай амжилтыг үзүүлсэн юм.
Гурван өнгөтнүүдийн хувьд ч тэр үнэлж баршгүй тоглогч. Анх 2000 онд шигшээ багтаа дуудагдсанаас хойш , багийнхаа арын албыг найдвартай хариуцаж дасгалжуулагчдын итгэлийг хүлээдэг байлаа. 2002 оны ДАШТ , 2004 оны Евро , 2006 оны ДАШТ , өнгөрсөн жилийн Евро гээд л энэ  хугацаанд тэр нэг ч том тэмцээнийг өнжиж үзээгүй.
Ялангуяа Германд болсон Мундиал түүний хувьд үнэхээр дурсамжтай өнгөрсөн. Бараг л эх орондоо тоглож байгаагаас ялгаагүй нөхцөлд Вилли тоглолт болгонд гараанд гарч , шилдэг тоглолтыг үзүүлж байлаа. Аврагын төлөө Италитай хийсэн тулааныг та бүгд санаж байгаа байх. Пеналтиар ялагчийг шийдэх болсон эгзэгтэй үед Раймон Доменек хамгаалагч Санёлоор цохилтыг гүйцэтгүүлсэн нь түүнд ямар их итгэдгийн шинж бизээ. Харамсалтай нь Алтан Дагиныг хүртэхэд түүнд ганцхан алхам л дутсан.
Ямар ч байсан энэ залууг Францын дэмжигчид гэлтгүй дэлхийн хөлбөмбөг сонирхогчид бүгд дурсан санаж байх болно.
Дашрамд дурьдахад тэрээр зодог тайлаад АС Монако багийн спорт эрхэлсэн захиралаар ажиллахаар болсон гэнэ лээ.