NHL-ийн 57 дахь удаагийн “Бүх оддын тоглолт” өнгөрөгч ням гаригт боллоо. Эхний шайбыг “Өрнөд” конференцийн шигшээ баг оруулсан ч түүнийхээ дараа удаан хугацааны турш санаачлагыг алдсан. Үүнийхээ уршгаар хаалгаа дөрвийн дөрвөн гоолоор мялаалгуулав. Эдгээр гоолын эзэд нь “Дорнод”-ын Овечкин, Стаал, Ковалёв, Марков байлаа. Харин хоёрдугаар үед “Өрнөдийнхөн” илт сэргэж, 8:8 болгон тэнцүүллээ. Тэд хамгаалалтдаа тун сайн тоглосны үрээр сөрөг довтолгоонд амжилттай шилжиж, хүссэн амжилтдаа хүрэв.

Төгсгөлийн үед хоёр тал харилцан өгөө аваатай тоглосон. Гэхдээ 55 дахь минутад Кейний ачаар “Өрнөд” баг тоглолтыг тэргүүлсэн. Үүнээс улбаалан үзэгчид хожил тэднийх болно хэмээн дүгнэж суутал тоглолт дуусахаас гурван минутын өмнө Боумистер Овечкиний дамжуулалтаар тэнцээний (11:11) шайбыг хийжээ. Ингэснээр өрсөлдөөн нэмэлт цагт үргэлжилсэн. Гайхалтай нь, овертаймын хоёр үед хаалганд нэг ч аюултай довтолгоо хийгдсэнгүй.

Үзэгчдийн хардаж байсанчлан тоглогчид буллит цохих үүднээс тэнцээний дүнг хадгалжээ. Ялалтыг тодруулах буллитийг “Дорнод”-ын Ковалёв, Нэш, Овечкин нар ончтой гүйцэтгэснээр тус баг ялалт байгуулав. Харин “Бүх оддын тоглолт”-ын үнэ цэнэтэй тоглогчоор хоёр гоол, нэг дамжуулалт хийсэн Алексей Ковалёвыг нэрлэсэн. Шилдгийг тодруулахад ч тохироо орсон нь илт байлаа. Учир нь ижил үзүүлэлттэй дөрвөн тоглогч байхад тэднээс хамгийн тааруу тоглосон Ковалёвт MVP-г өгсөн юм.

100 жилийнхээ ойг тэмдэглэж буй “Монреаль Канадиенс” клубийн хоккейчныг шалгаруулах нь шударга хэмээн зохион байгуулагчид үзэн дээрх шийдвэрийг гаргасан гэнэ лээ. Эцэст нь зарим баримт дурьдахад Монреальд болсон “Бүх оддын тоглолт” овертаймд үргэлжилсэн тав дахь тохиолдол болов. Мөн 22 шайб оруулсан үзүүлэлтээрээ түүхэнд хоёрдугаарт бичигдлээ. Дээд амжилтыг 2001 онд Колорадод зохиогдсон “All Stars game” (26 гоол) эзэмшдэг билээ. Харин нэг үед оруулсан 10 шайбаараа рекорд тогтоосон байна. Ковалёвын тухайд MVP-ээр нэрлэгдсэн хоёр дахь орос хоккейчноор тодорлоо. Түүний өмнө Павел Буре (2000 он) дээрх шагналыг хүртэж байв.