Австралийн нээлттэй тэмцээний ганцаарчилсан төрлийн шигшээ тоглолтонд тоглох тамирчдын нэрс тодорч байна.

Эмэгтэйчүүдийн төрөлд ОХУ-ын теннисчин, чансаагаараа тэмцээний 3-т бичигдсэн Динара Сафина өөрийн нутаг нэгт Вера Звонареваг хожиж, “Их дуулга”-ын шигшээд 2 дахь удаагаа шалгарч байна. Өмнө нь тэрээр 2008 оны “Роллан Гаррос”-ын аваргын төлөө Сербийн Ана Ивановичэд хожигдож байлаа.

Нөгөө талаас АНУ-ын теннисчин Серена Уилльямс шигшээд шалгарлаа. “Дүү” Уилльямс хагас шигшээд мөн л ОХУ-ын Елена Дементьеватай тоглож, 2 сетэд дараалан хожсон юм.

Харин эрэгтэйчүүдийн ганцаарчилсан төрлийн шигшээ тоглолтонд Швейцарийн Рожер Федерер шалгараад байна. Тэрээр өнөөдөр өөрийн үе тэнгийн өрсөлдөгч, АНУ-ын Энди Роддикийг 3 сетэд дараалан хожсон юм. Ер нь ч Федерер Роддикийг хожоод гаршсан гэж хэлж болно. Хоорондын тоглолтын харьцаа нь 16-2!.

Федерерийн өрсөлдөгч нь маргааш тодорно. Маргааш Рафаель Надаль – Фернандо Вердаско нар хагас шигшээгийн тоглолтоо хийх юм.