Багуудын дасгалжуулагчдын саналаар Бүх оддын тоглолтонд оролцох тоглогчдын нэрс тодорлоо.

Гарааны тоглогчдыг үзэгчид, хөгжөөн дэмжигчдийн саналаар тодруулдаг бол нөөц тоглогчдыг лигийн багуудын дасгалжуулагч нар тодруулдаг. 2 хамгаалагч, 2 довтлогч, 1 төвийн тоглогч, байрлал харгалзахгүй 2 тоглогчийг дасгалжуулагч нар нэрлэж, хамгийн олон санал авсан нь Бүх оддын тоглолтонд оролцдог.

Энэ жил дасгалжуулагчдын саналаар Дорнод бүсээс:

-          Крис Бош – Торонто Рэпторс. 23.2 гэсэн дундаж оноогоороо лигт 8-д бичигдэж байгаа. 4 дэх удаагаа дараалан Бүх оддын тоглолтонд оролцох гэж байна.

-          Денни Грейнжер – Индиана Пейсерс. Багийнх нь амжилт муу байгаа ч 25.8 оноо дунджаар авч байгаа учраас анх удаагаа оддын тоглолтонд оролцох нь

-          Девин Харрис – Нью Жерси Нетс. Харрис 21.6 оноо дунджаар авч байгаа бөгөөд Нетсийн лидер болсон гэхэд болно. Залуу тоглогч мөн л анх удаагаа “од” болж байна.

-          Жо Жонсон – Атланта Хоукс. Багийн болоод тоглогчийн амжилт аль аль нь сайн байгаа тул Жонсоныг 3 дахь удаагаа Бүх оддын тоглолтонд оролцох гэж буйд гайхах хэрэггүй

-          Рашард Льюис – Орландо Мэжик. Тэрээр 2005 онд Сиэтлийн тоглогч байхдаа Бүх оддын тоглолтонд оролцож байсан бөгөөд энэ удаа Дорнод бүсийн оддын багт багтлаа.

-          Жамеер Нельсон- Орландо Мэжик. Мэжикийн сайн амжилт энэ багаас 3 тоглогчийг оддын багт багтааж байна. Өмнө нь Мэжикээс 3 тоглогч Бүх оддын тоглолтонд оролцож байгаагүй.

-          Пол Пирс – Бостон Селтикс. Шигшээ тоглолтын үнэ цэнтэй тоглогчийн нэр оддын тоглолтонд оролцох тоглогчид дотор багтлаа. Пирс энэ улиралд дунджаар 18.8 оноо авч, баг нь 38-9 амжилттай тоглож байгаа.

Өрнөд бүсээс:

-          Чонси Биллапс – Денвер Наггетс. Биллапс төрөлх нутагтаа ирснээс хойш өөрөө ч сайн тоглож байгаа, багийнх нь амжилт ч сайн байгаа. Нэг тоглолтонд дунджаар 19.1 оноо авч байгаа нь түүний хамгийн өндөр үзүүлэлт.

-          По Газоль – Лос Анжелес Лейкерс. 2006 онд Бүх оддын тоглолтонд оролцож байсан. Энэ удаагийнх 2 дахь нь болж байна. Шилдэг багуудтай Өрнөд бүсийг Лейкерс тэргүүлж байгаад Газолийн хувь нэмэр, үүрэг роль маш их.

-          Дирк Новицки – Даллас Маверикс. Энэ улиралд 24.7 оноо, 8.0 самбар дундчилж байгаа. Далласын лидер 8 дахиа дараалан Бүх оддын тоглолтонд оролцох нь.

-          Шакил О’Нил – Финикс Санс. 15 дахь удаагаа Бүх оддын тоглолтонд оролцох нь. Түүний өмнө 19 удаа оролцсон Карим Абдул Жаббар л бичигдэнэ.

-          Тони Паркер – Сан Антионо Спэрс. Улирлын эхэнд шагайны гэмтлийн улмаас 9 тоглолт өнжсөн ч 3 дахь удаагаа Бүх оддын тоглолтонд оролцох гэж байна. 20.4 оноо, 6.6 оновчтой дамжуулалт нь түүний хамгийн сайн үзүүлэлт.

-          Брэндон Рой – Портлэнд Трэйл Блезэрс. 3 дахь улиралдаа лигт тоглож байгаа тэрээр 2 дахь оддын тоглолтондоо оролцох гэж байна. Өнгөрсөн жил анх оролцохдоо 18 оноо авч байсан. Энэ улиралд дунджаар 21.8 оноо авч байгаа.

-          Дэвид Уэст – Нью Орлеанс Хорнетс. 2 дахь удаагаа дараалан “All Stars”-д нэрлэгдэж байна. Дунджаар 20.0 оноо авч байгаа.

Эдгээр тоглогчид дээр Дорнод бүсээс Аллен Айверсон, Дуэйн Уэйд, ЛеБрон Жеймс, Кевин Гарнетт, Дуайт Ховард, Өрнөд бүсээс Крис Пол, Коби Брайант, Амаре Стаудмайр, Тим Данкан, Яо Мин нар нэмэгдэж, 2009 оны Бүх оддын тоглолтонд оролцоцгоох юм.

Өрнөд бүсийн дасгалжуулагчаар Лейкерсийн Фил Жексон ажиллах нь тодорхой болоод байгаа бөгөөд тэрээр өмнө нь 1992, 1996, 2000 онуудад оддыг удирдаж байж.

Дорнод бүсээс Кливлендийн Мо Уилльямс, Бостоны Рэй Аллен, Ражон Рондо, Нью Жерсигийн Винс Картер, Вашингтоны Энтуан Жэмисон, Филлигийн Андре Игуодала нар хараахан нэрлэгдэж чадсангүй. Хэрэв Айверсон гарааны санал авч чадаагүй бол дасгалжуулагчдаас лав дэмжлэг авахгүй байсан тул эдгээр тоглогчдын аль нэгэнд боломж гарч болох байлаа. Дээрх тоглогчид бүгдээрээ энэ улиралд Айверсоноос сайн тоглож байгаа.

Харин Өрнөдөөс талбайн эзэн Стив Нэш, Миннесотагийн Эл Жефферсон, олимпийн аварга Дерон Уилльямс, олон фэнтэй Кармело Энтони, “од” шиг тоглож байгаа Пол Миллсап болон Кевин Дюрант нарт аз дутлаа.

Кармелогийн хувьд гэмтлийн улмаас одоо ч тоглохгүй байгаа нь нөлөөлсөн бол Дюрант, Жефферсоныг багийнх нь тааруу амжилт хойш нь чангаав. Харин Нэш болон Дерон нарт ердөө л сул зай олдсонгүй гэхэд болно.

Мөн шинэ тоглогчид болон 2 дахь жилдээ тоглож байгаа тоглогчид хоорондоо тоглодог бөгөөд оролцох тоглогчид ч тодров.

Шинэ тоглогчдын багт: Дерик Роуз, Майкл Бисли, Өү.Жей.Майо, Рассел Уестбрук, Брук Лопес, Эрик Гордон, Руди Фернандез, Грег Оден, Марк Газоль

2 дахь жилдээ тоглож байгаа тоглогчдын багт: Аарон Брукс, Уилсон Чандлер, Кевин Дюрант, Жефф Грин, Эл Хорфорд,  Луис Скола, Эл Торнтон, Родни Стаки, Таддеус Янг нар тус тус багтсан байна.

Цагираган дээрээс довтлох тэмцээнд өнгөрсөн оны аварга Дуайт Ховард, 2006 оны аварга Нэйт Робинсон, мөн Руди Гэй нар дээр үзэгчдийн саналаар Руди Фернандез нэмэгдэж оролцохоор болоод байна.

Өнөөдөр лигт 2 тоглолт болсон. Дорнодын топ багуудын тоглолт талбайн эзэн Орландогийн хожлоор өндөрлөв. Харин Өрнөдийн өрсөлдөгчдийн тоглолтонд дахиад л Спэрс хожлоо. Санс хожигдсон ч Шакил бүх цаг үеийн онооны лидерүүдийн жагсаалтын 7-р байранд Хаким Олажьювоныг ардаа орхин бичигдэж эхэслэн бол Стив Нэш оновчтой дамжуулалтын лидерүүдийн жагсаалтын 11-р байранд өөрийн багийнхаа дасгалжуулагч Терри Портерийг гүйцэн бичигдэж эхлэв.

“Орландо” – “Кливленд” – 99:88 (25:32, 30:24, 24:16, 20:16)

О: Дуайт Ховард – 22+18 самбар. Туркоглу – 19+11 самбар. Льюис – 19.

К: Л. Жеймс – 23+8 самбар+8 дамжуулалт. Щербяк – 14. Хиксон – 13.

“Финикс” – “Сан-Антонио” – 104:114 (31:32, 26:25, 27:32, 20:25)

Ф: Стаудемайр – 28+10 самбар. Хилл – 20+10 самбар. Нэш – 16+18 дамжуулалт.

С: Жинобили – 30+9 самбар. Т. Паркер – 26. Данкан – 20+15 самбар.