Элтон Брэнд жагсаалаас гарав

Лос Анжелес Клипперсээс 76чууд руу таван жилийн хугацаатай 80 сая долларын үнэтэй ирсэн хүчний довтлогч Элтон Брэндийн 76чуудад өнгөрүүлсэн эхний улирал дуусгавар боллоо. Энэ улирлын дундаас түүнийг зовоож байгаа баруун мөрний гэмтэлдээ хагалгаа хийлгэхээр шийдсэнээр тэрбээр Гилберт Аренас, Майкл Редд, Жамеер Нельсон, Андре Кириленко зэрэг оддын араас оров.

Тэрбээр ирэх даваа гарагт хагалгаанд орохоор шийдсэн бөгөөд 76чуудад эхний улиралдаа ердөө л 29 тоглолтонд оролцож, 13.8 оноо, 8.8 самбараас авалт хийж байсан билээ. Тэрбээр багтайгаа хамгийн сүүлд өнгөрөгч хоёр дахь өдөр Бостонд ганцхан онооны зөрүүтэй хожигдоход 9 минут талбайд гарч нэг ч оноо аваагүй билээ.

Рэй Аллен Жамеер Нелсоныг орлоно

Мөрний гэмтлээс болж тоглолтыг харамсалтай орхисон Жамеер Нельсоныг Бүх Ододын тоглолтонд Бостоны их гурвалын нэг Рэй Аллен орлохоор боллоо. Ингэсэнээр анх нэгдсэнээсээ хойш хоёр жил дараалж гурван тоглогч нь гурвуулаа Бүх Ододод нэрлэгдэж байна. Өмнө нь Кевин Гарнетт үзэгчдийн саналаар, Пол Пирс дасгалжуулагчдын саналаар тус бүр ороод байсан юм. Рэй Аллен өнгөрсөн жил 28 оноо авч Зүүн, Барууныг 134-128 аар ялахад онцгой хувь нэмэр оруулж байсан билээ.

Өдгөө гэмтэлтэй байгаа Жамеер Нельсон мөн Ур чадварын тэмцээнд хүчээ үзэхээр бэлтгэж байсан билээ. Түүний оронд хэн оролцохыг удахгүй тодруулах байх.

Орландо, Милуоки наймаа хийв

Орландо Жамеер Нелсоныг орлох холбогчоо олжээ. Энэ бол өдгөө 32 настай Тайрон Лю юм. Энэ улиралд 4.7 оноо, 1.5 дамжуулалт өгч байгаа тэрбээр Милуоки Бакс багаас Орландо руу хамгаалагч Кет Боганс+ бэлэн мөнгөөр солигдсон байна. Милуокид Люк Риднур болон Рамон Сешнс гэсэн хоёр холбогч бий тул Тайрон Лю илүүдэж байсан мөн багийн гол онооны машин Майкл Редд улирлыг өнжихөөр болсон зэрэг нь хамгаалагч Кет Богансыг авах гол шалтгаан болжээ.

Тайрон Лю 2003-2004 онд Орландод Энтони Жонсоны нөөц холбогч байсан бөгөөд 76 тоглолтонд оролцож байжээ.