Энэ долоо хоногт шигшээ багуудын хооронд нөхөрсөг тоглолтууд болно. Сүүлийн 2 дэлхийн аваргад түрүүлсэн шигшээ багууд болох Бразил – Итали, энэ оны Европын аварга Испани  Англитай, мөн Аргентин Францтай зэрэг олон сонирхолтой тоглолт болно.

Гэхдээ зарим нэгэн шилдэг тоглогчид эдгээр тоглолтуудыг өнжих нь. АС Милан өнгөрсөн амралтын өдөр Режжинаг талбай дээрээ хүлээн аван тоглож, 1:1-ээр тэнцсэн. Миланы ганц гоолыг хагас хамгаалагч Кака торгуулийн цохилтоор хийсэн боловч үндсэн цаг дуусахаас 12 минутын өмнө зүүн хөлөндөө гэмтэл аван талбайг орхисон бөгөөд тэрээр Италитай хийх нөхөрсөг тоглолтонд оролцож чадахгүй болжээ. 2 долоо хоног орчим гам барих шаардлагатай  гэнэ.

Мөн Испаний шигшээ багийн гол хамгаалагч Карлес Пуойль Англитай хийх тоглолтыг өнжих нь. Өчигдөр Барселона Спортингтой тоглосон бөгөөд Пуойль мөн хөлөндөө гэмтэл аван, тоглолтыг дуусгаагүй юм. Барсагийн эмч нар түүнийг Англитай хийх тоглолтонд оролцох боломжгүй гэж үзсэн байна.

Ингэснээр Висенте Дель Боске түүнийг орлох хамгаалагчийг сонгох хэрэгтэй болоод байна.