“Лос-Анжелес Гэлакси” болон Америкийн хөлбөмбөгийн лигийн зүгээс Дэвид Бекхэмийн асуудлыг түргэн хугацаанд шийдэх хэрэгтэй гэж үзжээ. Түргэн хугацаа гэдэг нь  хоёрдугаар сарын 13 буюу өнөөдрөөр төгсгөл болох учиртай аж.

Сүүлийн үед Английн шигшээ итали дасгалжуулагчтай /Фабио Капелло/ болсноор Дэвид “Милан”-ийг зорих хүсэл өвөртлөх болж,  гуравдугаар сарын 9-нийг хүртэл Италид байгаа билээ. “Гэлакси” 2007 онд жилийн 32.5 сая ам.долларын 5 жилийн гэрээг Дэвидтэй байгуулсан. Гэвч “Милан”-д Бекхэм тун сайн тоглож байгаа тул тэндээ үлдэх хүсэлтэй байгаа тухай яриа гарах болсон. Энэ яриаг тэгтэл ужгируулж бас нэгэн маркетингийн нүүдлийн бай болохыг америкчууд хүсэмжлэхгүй байгаа бололтой.

“Гэлакси”-гийн дасгалжуулагч Брюс Арена энэ тухай “Дэвид аль багт нь цаашид тоглохыг сунжруулалгүй шийдэх нь хэн хэнд нь хэрэгтэй гэж би бодож байна. Юу болохыг би хэлж мэдэхгүй байна. Гэхдээ л ойрын хугацаанд бүх зүйл тодорхой болно. “Милан”-ынхан бидний асуудлыг хурдхан шийдэхийг хүсч байгааг ойлгох байлгүй. Бекхэм талбай дээр ч талбайгаас гадуур ч бидэнд хэрэгтэй зүйл их хийдэг. Гэхдээ тэр явахыг хүсвэл… спортын хууль ийм шүү дээ. Хөлбөмбөг бол сагсанбөмбөг шиг ганц тоглогч бүхнийг шийддэг эд биш. Манай багт өөр олон сайн тоглогч байгаа” гэж хэлжээ.

Харин Америкийн лигийн комиссар Дон Гарбер “Баасан гаригт шинэ гэрээ байгуулах уу эсвэл эргэж ирэх үү гэдгийг тодорхой болгох хэрэгтэй. Үүнээс хойш байдал сунжирвал би ямар ч солилцоо наймаа хийхийг хориглоно. Энэ асуудлыг ужгируулаад байх шаадлагагүй гэж үзэж байна” хэмээн мэдэгдсэн юм. Бекхэм харин өөрөө энэ тухай “Миланд ирснээр би Лос-Анжелест байснаас хавьгүй илүү бэлтгэлтэй болсон. Хөлбөмбөг тоглох хүсэл минь дахин оргилсон ч гэж хэлж болно. “Милан” “Лос-Анжелес”-ынхан асуудлыг зөвөөр шийдэж, би Италид үлдэх боломж олдох байх гэж найдаж байгаа” хэмээн ярьсан байна. Америкт хөлбөмбөгийн үрийг тарихаар одсон Бекхэм ийнхүү өнөөдөр үүсгээд буй холион бантаныхааа учрыг гаргаж хэлэх үүрэг хүлээлээ.