Гуус Хиддинк “Chelsea TV”-д доорхи ярилцлагыг өгснийг элдэв нэмэлт оршилгүйгээр товчлон хүргэж байна.

- Та бусад бүх саналаас татгалзах байсан гэж хэлсэн. Яагаад ганцхан “Челси”-д за гэж хэлсэн юм бэ?

- “Челси” болон Оросын хөлбөмбөгийн холбооны хоорондын харилцаа холбооны тухай бүгд мэднэ. Наашаа ирэхэд бас Роман Абрамович бид хоёрын харилцаа ч нөлөөлсөн. Энэ үнэхээр агуу баг. Гэхдээ үнэнээ хэлэхэд, туслаач гэсэн болохоор нь л ирсэн.

- Та тун хүнд үед ирлээ. Одоо маш чухал гурван тоглолт хүлээж байна. Бүгдэд нь та ялах учиртай…

- Та л ингэж надад дарамт юм шиг хэлээд байгаа болохоос энэ бол энгийн л ажил. Би саяхан л багийнхантай хувцас солих өрөөнд ярилцлаа. Гэхдээ би энд зөвхөн ярилцах гэж ирээгүй. Түргэн хугацаанд үр дүнд хүрэх ёстой.

- Лигт бид “Астон Вилла”-тай одоо тоглоно. Үүнээс өмнө бид “МЮ”-аас 10 оноогоор дутуу ч болж магад. Ийм зөрүү байхад аварга болно гэж найдах хэрэг байна уу?

- Бид Английн цом, Аваргуудын лиг, Премьер лиг гээд гурван тэмцээнд оролцож байгаа. Зөрүү нь 10 оноонд хүрлээ ч гэсэн тэмцээний төгсгөл рүү ямар ч өөрчлөлт гарч болохыг хөлбөмбөгийн түүх гэрчилдэг шүү дээ.

- Премьер лиг болон “Челси”-гийн тоглогчидтой хэр танилцсан бэ?

- Алекстай хэдэн жил ажилласан. “Челси”-гийн бусад тоглогчдыг ч мэднэ. Харин залуусыг сайн мэдэхгүй. Гэхдээ тэд үндсэн багтай хамтдаа бэлтгэл хийж байгаа болохоор би сайн ажиглах боломжтой байгаа. Ер нь тоглогчдыг бүгдийг нь мэднэ гэж хэлж болно доо.

- “Ювентус”-тай тоглох хугацаа ойртлоо. Та 1988 онд Аварга багуудын цомд түрүүлж байсан. 2005 онд бас түрүүлэх дөхсөн. Энэ жил дахин энэ тэмцээнд түрүүлэх нь танд хэр чухал вэ?

- Оролцож буй бүх тэмцээн маань л чухал. “Астон Вилла” дараа нь “Ювентус” гээд байдал их сонирхолтой болж ирнэ. Гэхдээ манай баг шигшээ тоглолтод хүрэх туршлагатай, сайн баг.

- Та 1998 онд “Челси”-гийн эсрэг тоглож байсан…

- Тийм ээ, Монакод болсон супер цомын тэмцээн. Тэгэхэд “Реал”-ыг удирдаж байлаа. Тэр тоглолтод “Челси” хожигдсон.

- Та үргэлж нэг тактик сонгодог уу. Эсвэл байдлаас шалтгаалан байнга өөрчилж байдаг уу?

- Байгаа багаа л сайн хардаг. Шаардлага, соёл уламжлал талыг ч харах хэрэгтэй болдог. Солонгос, Оросын шигшээ багтай ажиллах том багуудад ажиллахаас их өөр. Гэхдээ л аль болох түргэн хугацаанд гарч, боломжийг олж харж ажиллахыг хичээдэг.

- “Астон Вилла”-гийн эсрэг ямар тактик хэрэглэх тухай бодол байна уу?

- Би тийм нарийн зүйл яримааргүй байна. 4-4-2, эсвэл 3-5-2 гэх юм уу. Ер нь ямар тактик сонгох нь биш бөмбөгтэй, бөмбөггүй хэрхэн тоглох нь л чухал.

- Та хашир уу эсвэл эрсдэлд дуртай дасгалжуулагч уу?

- Би их хашир биш ээ. Баг маань байрлал бүрд довтолгоонд оролцох чадвартай байх ёстой. Тэгээд ч англид довтолгоонд дуртай болохоор миний тактик таалагдах байх гэж бодож байна.

- Та бараг ажилласан баг бүртээ ялалт авчирч байсан… Танд ямар ялалт дутуу байна гэж боддог вэ?

- “Реал”-тай би аварга болж чадаагүй. Тив хоорондын цом авсан л даа. Гэхдээ богино хугацаанд лигийн аварга болгож чадаагүй. Англид өмнө нь ажиллаж байгаагүй. Тэгэхээр энэ нь надад их туршлага суулгах байх. Тэгээд ч Английн лигийг хамгийн шилдэг нь гэх болсон. Мэдээж, багтайгаа ялалтад хүрэхийн тулд хичээх болно.

- Та тавдугаар сар хүртэл л ажиллах болно. Энд таалагдаад байвал үлдэх боломж бий юу?

- Энд үнэхээр сайхан гэдгийг би одоо ч мэдчихээд л явж байна. Гэхдээ тавдугаар сар өнгөрөөд юу болох тодорхой. Оросын өмнө хүлээсэн үүрэг надад бий. Тэгээд ч хоёр ажил давхар хийх амаргүй. Премьер лиг ч их хөдөлмөр шаардана шүү дээ. Одоо бол зургадугаар сар хүртэл цөөхөн тоглолт байгаа болохоор “Челси”-д ажиллах боломж бий.