Өнөөдөр буюу битүүний өдөр 17-р жарны “Харшлалт” хэмээх Шороон Үхэр жилийн сар шинийн баярт зориулсан хүчит бөхийн барилдаан Монгол Бөхийн Өргөөнд боллоо. Барилдаанд уламжлал ёсоор хүчит 256 бөх барилдсан бөгөөд өмнөх жилүүдэд 2 өдрийн турш барилддаг байсан бол энэ удаа нэг өдөр барилдлаа.

Өнөө цагийн бөхчүүдийн өнгийг тодорхойлж байгаа хүчитнүүдээс Улсын аварга Д. Сумъяабазар, Улсын арслан Д. Азжаргал, Улсын гарьд Н. Ганбаатар, Улсын заан Д. Рагчаа, Улсын харцага Н.Амартүвшин нар барилдсангүй. Мөн улсын наадмаас өөр барилдаанд гарахаа болиод байгаа Улсын гарьд Б. Гантогтох бас барилдсангүй. Гэсэн ч энэ жилийн сар шинийн барилдаан өрсөлдөөнтэй, үзүүштэй сайхан л боллоо. Дээрх бөхчүүд барилдсан бол бүр л “амттай” болох байсан биз.

Доогуур даваануудад бага сага маргаанууд гарч байсан ч ерөнхийдөө булхай, будлиан нь ч гайгүй байсан гэхэд болно. Гэхдээ манай бөхчүүд зөвхөн тухайн даваанд давахын төлөө зарга зальхай хийхээ хойш тавьж, үндэсний бөхийнхөө жудаг ёс, шударга байдлыг байнга бодож, сахиж явбал наанадаж үзэгч олноо хүндэтгэж байгаа хэрэг, цаашлаад бөхийн торгон ногоон дэвжээгээ дээдлэн эрхэмлэж байгаа явдал болох гэдэг нь ойлгомжтой.

Энэ жилийн сар шинийн барилдаанд улсын цолгүй залуучуудаас нэг ч бөх 4 давсангүй.

4-ын даваанд өнгөрсөн улсын наадмаар 5-ын даваанд тунаж байсан Соронзонболд заан, Бямбажав арслан нар оноолт таарсан бөгөөд заан Соронзонболд хүч бяраар илүүрхэн давсан. Улсын харцага Даваабаатарыг Баянхонгор аймгийн Улсын начин Батболд бараг л 2 удаа давчих шиг болсон.

5-ын даваанд хуучны 2 өрсөлдөгч барилдсан нь үзэгчдийн сонирхлыг татаж байлаа. 10 гаруй жилийн өмнө болж таарах нь, Ганбат, Батзориг нар аймгийн арслан, цэргийн заан цолтой байхаасаа эхлээд 3-ын даваанд мөн ч олон тунаж байсан. Тухайн үедээ Батзориг нь ихэнхдээ давдаг байсныг санаж байна. Энэ удаа харин Ганбат заан амлаж барилдан, мордох мэхээр эртний өрсөлдөгчөө давсан юм.

6-ын даваанд Өсөхөө аваргатай Батболд начин тун сайн барилдаж, нэлээн л дөхүүллээ. Аварга аргагүй арал чац зааж, начингийн хавираанд үлдсэн. Гэхдээ энэ сар шинийн барилдаанаар  Батболд начин маш сайн барилдсаныг дурьдах нь зүйтэй.

Үзүүр түрүүний 2 бөхийн барилдаан тун ч богино хугацаанд өндөрлөсөн. Аварга зааны гарыг нь зөрүүлж татах оролдлого хийх үед заан хавирч, аваргыг тэнцвэр алдуулан толгойг нь уургалан баглаж аваад, өвдөглүүлснээр Сар шинийн барилдаанд анх удаа түрүүллээ.

4-ын даваа

д.а Өсөхбаяр – а.з Мөнхбат
у.а Мөнхбаатар – а.а Батбаяр
у.а Ганхуяг – а.а Отгонбаатар
у.г Доржсамбуу – а.а Чулуунбат
у.з Ганбат – а.а Батмөнх
у.з Мягмарсүрэн – а.а Баянмөнх
у.з Батзориг – а.а Амартүвшин
у.з Сайнбаяр – а.а Содномдорж
у.з Соронзонболд – ц.а Бямбажав
у.х Мөнгөнцooж – у.н Цацавшир
у.х Пүрэвжав – у.н Бат-Эрдэнэ
у.х Баасандорж – у.н Гантулга
у.х Даваабаатар – у.н Батболд
у.н Эрхэмбаяр – у.н Цанлиг
у.н Лхагвасүрэн – у.н Ду.Батбаяр
у.н Цогтжаргал – у.н Уламбаяр
5-ын даваа

д.а Өсөхбаяр – у.н Цацавшир
у.а Мөнхбаатар – у.х Баасандорж
у.а Ганхуяг – у.н Уламбаяр
у.г Доржсамбуу – у.з Сайнбаяр
у.з Ганбат – у.з Батзориг
у.з Мягмарсүрэн – у.н Батболд
у.з Соронзонболд – у.х Пүрэвжав
у.н Эрхэмбаяр – у.н Ду.Батбаяр
6-ын даваа

д.а Өсөхбаяр – у.н Батболд
у.а Ганхуяг – у.н Ду.Батбаяр
у.г Доржсамбуу – у.х Баасандорж
у.з Ганбат – у.з Соронзонболд
7-ын даваа

д.а Өсөхбаяр – у.х Баасандорж
у.з Ганбат – у.н Ду.Батбаяр
8-ын даваа

д.а Өсөхбаяр – у.з Ганбат