Девисийн цомын эхний шатанд учраа таарсан Швед-Израйлийн багуудын тоглолт үзэгчгүй ордонд явагдахаар болжээ.Тэмцээнийг зохион байгуулагчид үүнийг тайлбарлахдаа ”Израйлийн эсрэг үзэлтнүүд тоглолтын үеэр үймээн дэгдээх гэж буй мэдээ ирсэн учраас тамирчдын аюулгүй байдлыг бодолцож ийм шийдвэр гаргасан ‘‘ гэжээ. Харин Израйлийн теннисний холбооны ерөнхийлөгч Майкл Клейн энэ талаар ”Улс төрийн зөрчил мөргөлдөөн энэ мэтээр спортын ертөнцөд нөлөөлж буй нь үнэхээр харамсалтай. Тэр тусмаа Швед зэрэг амар тайван орнуудад хүртэл шүү” хэмээжээ.Ер нь он гарсаар Израйлийн тамирчдыг тойрсон элдэв шуугиан тасрахгүй байгаа. Нэг сарын сүүлээр сагсан бөмбөгийн шигшээ багийнхан руу нь Туркийн дэмжигчид дайрч үймээн дэгдээсэн бол саяхан Дубайн теннисний тэмцээнд Израйлийн тамирчин Шахар Пийрийг оролцуулахгүй гэж нилээдгүй хэл ам таталсан билээ.