Аваргуудын лигийн шөвгийн 8 баг тодорлоо. Нэг улсаас дээд тал нь 4 баг оролцох ёстой байдаг энэ тэмцээний шилдэг 8 багийн 4 нь Английн багууд болов. Шөвгийн 16-д Итали – Английн 3, 3 багууд хоорондоо халз тоглоход хөлбөмбөгийн эх орныхон 100 хувийн амжилт үзүүлсэн байна.

“Манчестер Юнайтед” (Англи) – “Интер” (Итали) – 2:0 (1:0)

Гоол: Видич, 4. Роналду, 49.

“Манчестер Юнайтед”: ван дер Сар, О’Ши, Видич, Фердинанд, Эвра, Каррик, Скоулз (Андерсон, 70), Роналду, Гиггз, Руни (Пак Чжи Сун, 84), Бербатов.

“Интер”: Жулио Сезар, Майкон, Самуэль, Кордоба, Сантон, Камбьяссо, Виейра (Мунтари, 46), Х. Дзанетти, Станкович (Адриано, 58), Ибрагимович, Балотелли (Фигу, 70).

Манчестер Юнайтед дөнгөж 4 дэх минутанд гоол хийсэн нь Интерт хүндээр тусч, Жозегийн бодож боловсруулсан тактик өөрчлөгдөхөөс аргагүйд хүрсэн. Райн Гиггзийн булангийн цохилтыг Серби хамгаалагч Н. Видич мөргөж гүйцээн тоглолтыг салхийг хагалсан байна. Видич Сан сирод болсон эхний тоглолтонд торгуулийн улмаас оролцоогүй. Өнгөрсөн оны 12 сард Японд болсон Клубуудын дэлхийн аваргаар бүдүүлэг тоглолт гаргасных нь төлөө Видичийг шийтгэсэн бөгөөд тэрхүү шийтгэл нь өнгөрсөн тоглолтыг өнжүүлсэн билээ.

Эхний үе 1:0-ээр өндөрлөсөн бол 2-р үе эхлээд мөн л 4 минут өнгөрч байхад Манчестер дахин гоол хийжээ. Криштиану Роналду өнгөрсөн улирлын Москвагийн шигшээ тоглолтноос хойшхи Аваргуудын лигийн анхны гоолоо орууллаа. Рунигийн дамжуулсан бөмбөгийг амжилттай мөргөж, тоглолтын хувь заяаг үндсэндээ тодорхой болгосон гэж хэлж болно. Юнайтед ийм чухал тоглолтонд 2 гоолны зөрүүгээ алдана гэдэг туйлын ховор тохиолдох үзэгдэл болов уу.

Ингээд тоглолтын цаг дуустал тооны харьцаа өөрчлөгдсөнгүй. М.Юнайтед сүүлийн 13 улиралд 10 дахь удаагаа шөвгийн 8-д шалгарч байна. Алекс Фергюсон болон Жозе Моуриньо нар хоорондоо 14 дэх удаагаа тулснаас Фергюсон 2 дахь хожлоо ийн авав. Одоогоос 5 жилийн өмнө Моуриньогийн Порту яг энэ шатанд Фергюсоны Юнайтедийг буулган авч, улмаар тэр жилээ Аваргуудын лигт түрүүлж байлаа. Юм ээлжтэй аж, энэ удаа Жозегийн баг ялагдлаа. Интер Аваргуудын лигт түрүүлэх мөрөөдлөө дахин нэг жилээр хойшлуулахаас өөр аргагүйд хүрч байна. 1965 оноос хойш мөн ч удаан хүлээж байна даа.

Тоглолтын дараа эрхэм Моуриньо: “Бид агуу багийн эсрэг сайн тоглолоо. Ер нь бол бидний аз тэднийхээс бага байсан. Хожилд аз үргэлж хэрэгтэй. Интерт тэр аз байсангүй. Гэхдээ Манчестер Юнайтед энэ удаа хожих гавьяатай байсан гэдгийг хэлье ” хэмээн айлджээ. Түүний үг үнэн байлаа. Харин Фергюсон: “Европын нэгэн урт шөнө байлаа. Хөлбөмбөгийн тоглолт уу, үхлийн тоглолт уу, би мэдэхгүй байсан. Гэхдээ би зөвхөн Манчестер Юнайтедэд л сэтгэл хангалуун байна. Бид хатуу учраатай таарсан, бид өрсөлдөгчөөсөө илүү тоглож чадсан. Дараагийн шатанд энэнээс ч сайн тоглож чадна гэдэгт итгэлтэй байна ” гэжээ.

Бямба гаригт Манчестер Юнайтед – Ливерпуль багууд Премьер лигтээ хэрхэн тоглохыг бас харцгаая даа.

“Рома” (Итали) – “Арсенал” (Англи) – 1:0 (1:0, 0:0, 0:0), торгуулийн цохилт. 6:7

Гоол: Жуан, 9.

Торгуулийн цохилт: Эдуардо – 0:0 (хаалгач). Писарро – 1:0. ван Перси – 1:1. Вучинич – 1:1 (хаалгач). Уолкотт – 1:2. Баптиста – 2:2. Насри – 2:3. Монтелла – 3:3. Денилсон – 3:4. Тотти – 4:4. К. Туре – 4:5. Аквилани – 5:5. Санья – 5:6. Риисе – 6:6. Диаби – 6:7. Тонетто – 6:7 (давуулсан).

“Рома”: Дони, Мотта, Жуан (Баптиста, 28), Диамутен, Риисе, Бриги (Монтелла, 120), Писарро, Тонетто, Вучинич, Таддеи (Аквилани, 90), Тотти.

“Арсенал”: Альмуния, Санья, Галлас, К. Туре, Клиши, Диаби, Денилсон, Эбуэ (Уолкотт, 75), Насри, Беннтнер (Эдуардо, 85), ван Перси.

Рома 9 дэх минутанд гоолдсоноор тоглолтын ерөнхий харьцаа 1:1 болон тэнцсэн. Үүнээс хойш багууд бараг л бүтэн 2 цаг тоглоод гоол хийж чадсангүй. Йймээс торгуулийн цохилтоор ялагчийг тодруулах боллоо. Торгуулийн цохилтыг азын сугалаа ч гэдэг. Энэ азын сугалаанд Арсеналын од гийжээ. Уг нь Ромаг талбай дээрээ, үнэнч хөгжөөн дэмжигчдийнхээ өмнө торгуулийн цохилт хийж байгаа болохоор хожих илүү магадлалтай байх гэж бодож байсан ч таамаг зөрлөө. Ромагийн хаалгач Дони нэг л одгүй, унжгар байлаа. Альмуниа ч ялгаагүй, ийм олон цохилтоос ердөө ганцыг хаадаг. Ромагийн сүүлийн цохилтыг Тонетто алдаагүй бол цаашаа хэд ч цохих байсан юм байгаан. 2 багаас тус бүр 8, 8 тоглогч торгуулийн цохилт цохьсон нь Аваргуудын лигийн түүхэн дэх хамгийн олон нь болсон байна.

Рома 5 сард өөрийн энэ цэнгэлдэхдээ шигшээ тоглолтыг хийх мөрөөдөл нь ийн замхран одлоо. Торгуулийн цохилтоо алдсан Тонетто Ромаг дэмждэг бүх хүнээс уучлал гуйсан байсан, нэгэнт алдсанаас хойш одоо яая гэхэв. Рома одоо Сери-А-д 6-р байранд бичигдэж байгаа, эхний 4-т багтаж, ирэх жилийн Аваргуудын лигт тоглохоо л бодохоос өөр сонголтгүй үлдлээ.