Испаний Валенси клубын хувьд энэ улирал хүндхэн үргэлжилж буй. УЕФА-н цомын шөвгийн 32-т Украйны Динамод дийлдсэн тэд одоогоор лигтээ дөнгөж наймдугаар байранд бичигдэж байна. Үүний хажуугаар дэлхий нийтийг сандаргаж буй санхүүгийн хямрал ч ”Нисдэг хулгануудыг’ тойрсонгүй. Иймээс клубын удирдлага хамгийн өртөг өндөртэй тоглогчоо зарж энэ хямралаас гарах аргыг эрэлхийлж буй аж. Клубын дэд ерөнхийлөгч Фернандо Гомез саяхан өгсөн ярилцлагадаа ”Үнэхээр аргагүйд хүрвэл Вильяг зарахаас өөр арга алга. В.Сориано (Валенси ерөнхийлөгч) Ситигийн удирдлагатай ярьсан гэсэн. Гэхдээ одоогоор бид ямар нэгэн тохиролцоонд хүрээгүй байгаа” гэжээ. Мөн Виллатай хамт Давид Силва ч Английг зорьж болох талаар Испаний хэвлэлүүд бичиж байна.
Өдгөө 27 настай Вилья өнгөрсөн найман сард багтайгаа зургаан жилийн гэрээ байгуулаад байсан билээ.