Монголын чөлөөт бөхийн холбооны бага хурал баасан, бямба гаригт “Чингис” зочид буудалд боллоо. Өглөө 09.00 цагт эхэлсэн хурал арваад минутад хэлэлцэх ёстой мандатын асуудалтай бараг 6 цаг “ноцолдов”. Улмаар өнгөрсөн дөрвөн жилийн ажлын тайлан, цаашдын чиглэл, хянан шалгах зөвлөлийн мэдээлэл зэргийг цаг гаруй сонсож, санал шүүмжлэлийг чамгүй удаан өрнүүлсэн.

Холбооны дотоод ажил муугүй байсан ч үндсэн үзүүлэлт болох олимпийн наадмаас медаль аваагүй (1984 оныг тооцвол долоон олимпоос хоосон ирсэн) талаар хүн бүр шүүмжлэлтэй хандаж байлаа. Хурлыг даргалсан Х.Баянмөнх аварга ОНЦМУУ гэж дүгнэнэ лээ. Сонин хэвлэлээр шуугиж байсанчлан хурлын уур амьсгал ширүүхэн эхэлсэн, өглөөгүүр. Харин үдээс хойш нь намдуухан үргэлжилж өндөрлөснийг онцлоё.

Дараа нь холбооныхоо дүрмийг хэлэлцэн батлах үед шөнө дөл болж, гуравдугаар сарын 14-ний 02:40-д зохион байгуулалтын хэсэг эхлэв. МЧБХ-ны ерөнхийлөгчид 2008 оны хавраас уг албыг хашиж буй Ч.Ганзориг (“Эрдэнэт” үйлдвэрийн ерөнхий захирал), “Гацуурт” компанийн ерөнхий захирал Л.Чинбат нарын нэр дэвшлээ. Холбооны Удирдах зөвлөлийн гишүүдийн тоо 31-ээс доошгүй байх, гишүүн бүр нэг жилд 5 сая төгрөгийн хандив өргөх босгыг дүрмэндээ нэмж тусгасан тул янз бүрийн төлөөллөөс бизнесийнхэн зонхилох 50 шахам хүний нэрийг дэвшүүлжээ. Тэднээс Л.Халтар (Төмөр зам), Ц.Эрдэнэбат (Ганьт), Ж.Мөнхтөр (Монгол алт), О.Баянмөнх (дасгалжуулагч) нар нэрээ татсанаар үлдэх 41 хүнийг бөөнд нь ил санал хураалтаар баталсан юм.

Харин МЧБХ-г ойрын дөрвөн жилд тэргүүлэх эрхмийн сунгаанд 153 төлөөлөгч нууцаар саналаа өгч (нийт 179 төлөөлөгчөөс) оролцлоо. Санал хураалтын дүнд 82:71-ээр “Гацуурт”-ын Л.Чинбат Чөлөөт бөхийн холбооны шинэ ерөнхийлөгчөөр сонгогдов. Тэрбээр ойрын үед холбооны дэд ерөнхийлөгч, ерөнхий нарийн бичгийн даргаа тодруулж Удирдах зөвлөлөөрөө батлуулах юм. Холбооны хурал үүрийн 04.00 цагт өндөрлөсөн.

Лхагва овогтой Чинбат. Монголын толгой баячуудын тоонд багтдаг тэрбээр Говь-Алтай аймгийн Бигэрийнх. Геологич мэргэжилтэй. Ерээд онд “Гацуурт” компаниа байгуулж Өвөрхангай, Сэлэнгийн нутгаар алт олборлож явсан аж. Сүүлийн үед мөн газар тариалан, хүнсний үйлдвэрлэл, зочид буудлын бизнест чамгүй амжилт олж буй. Даян аварга А.Сүхбатын фэн гэгддэг. 2007 оны сүүлчээр “Олимп” сургуулийг санхүүжүүлэн байгуулж спортод орж ирсэн.