Азийн олимпийн зөвлөл (OCA)-өөс анх удаа зохион явуулсан “OCA Sport Congress”-т гишүүн 45 орны төлөөлөгчдөөс  гадна дэлхийн шилдэг эрдэмтэн, судлаач, зүтгэлтэн, од тамирчид, хэвлэл мэдээллийн нийт 1200 гаруй төлөөлөгч оролцлоо.

ОУОХ-ны ерөнхийлөгч Ж.Рогге, ANOC-ын генсек Г.Линдберг, WADA-гийн ерөнхийлөгч Ж.Фэйхи нарын эрхэм дээд зочид уг ажиллагаанд хүрэлцэн ирсэн бөгөөд OCA-гийн тэнгэр баганадсан хос шинэ өргөө нээх ёслол энэ үеэр давхацсан билээ. МҮОХ-ны төлөөлөгчид шинэ байрыг мялаан, эзэн Чингис хааны хөрөг бүхий үнэт урлалыг өргөн барьж, анх 1982 онд тулгын чулууг нь тавилцсан OCA-гийн “оосор бүчгүй олимпийн цагаан өргөө”-нд хүндэтгэл үзүүллээ.

Хамгийн сонирхолтой нь саяхан “Бээжин-2008” олимпийн рингэнд гялалзтал тоглон, алтан медаль хүртсэн гавьяат тамирчин Энхбатын Бадар-Ууган маань “OCA Sport Congress”-ын хүндэт зочноор уригдаж, эрдмийн танхимд  орон орны мэргэжилтнүүдэд спортын амьдрал, амжилтын онцлогоосоо сэтгэл харамгүй хуваалцан, салбар хуралдаанд товч танилцуулга хийсэн юм.

OCA-гийн босс Шейх Ахмад Аль Фахад Аль Сабахын урилгаар Кувейтэд олимпийн аварга Э.Бадар-Ууганаас гадна үндэсний бөх, соёл урлагийн төлөөлөгчид бусад арга хэмжээнд нь оролцож, эх орноо сурталчилсныг дурьдахад таатай байна.