Намар Бундэслиг эхлэхэд аль баг дээгүүр жаалах вэ гэхэд бүгд л Байерн, Брэмэн, Хамбург, Шальке, Штуттгарт гэж байсан. Хэн ч Хэрта гэж хэлээгүй. Гэтэл лиг эхлээд хагас жил өнгөрөхөд Хэрта 4 оноогоор илүү хүснэгтийг өнгөлж явна. Тэдний гайхалтай гэмээр чанартай довтолгоо, хэрэм мэт бат хамгаалалт, ямар ч үед тайван байж чаддаг дасгалжуулагч нь энэ бүхний амжилтын үндэс. Воронин энэ багийн салшгүй нэгэн хэсэг болж, одоо багийн хамгийн чухал хүн болоод байгаа. Гэтэл өөр айлуудын тогоо руу өнгийхөд адилхан дүр зураг бас харагдах юм аа.

Сивасспор

Туркт аваргын төлөө өрсөлддөг ердөө 4 баг байдаг, тэд л бүх аваргын цомыг хувааж эзэмшдэг. Энэ жил гэтэл оройд нь өөр баг байхыг хараад нүд оройдоо гарч, нөгөө тоон доторхи үсэг харсан шиг ангайв. 3-хан жилийн өмнө дээд лигид орж ирсэн аж. Орж ирээд 2 жилийн дараа буюу ноднин тэд лигийн намрын аварга болсон ч хаврын урт өдрүүдэд сунаад хэвтчихэж. Энэ удаад харин нэлээн өөр байх бололтой. 2-р тойрог эхлээд талдаа орох дөхөж байхад Сивасспор нөгөө 4-ийнхөө дээр нь гишгэсээр л явна. Хэртад довтлогч нь топ од нь харагдаж байхад энд ч мөн адил. Мехмет Үлдиз 21 тоглолтод 13 гоол хийсэн амжилттай явна.
Багийн үнэлгээ – 33 сая
Дундаж цалин – 1,4 сая

Жэнуа

Сампдори энэ 2 цагийн сайханд дэлхийн хөлбөмбөг дэх нэгэн том дербид тооцогддог байлаа. Мөнгө бүхнийг эзэрхийлж эхлэхийн хэрээр аль аль нь топ тавцангаас шахагдаж эхэлсэн ч дерби бол дерби, одоо хэр нь энэ 2 багийн тоглолт асар өндөр хамгаалалтын дор явагддаг. Жэнуа 2005 онд тоглолт мэхэлсэн хэргээр 3-р лиг рүү жийгдсэн. Гэвч хуучны сайхан баг маань эргээд ирлээ гэдгээ энэ жил бүрэн дүүрэн харуулж эхэллээ. Том багуудын амьсгалыг бачууруулж байгаа нь тэд энэ жил тэднээс олон оноо авсан мөн Флоренц, Рома, Палермо, Лацио гэсэн хүчирхэг багуудын өмнө хүснэгтийн 4-р байранд зогсож байгаагаас харагдана. Энэ байр бол ЧЛ-ийн куалигийн эрх авах ганц байр билээ. Эдгээр том багуудад дийлдэж болох юм, гэсэн ч Европын лиг дээр бууна гэдэг бол маш том амжилт. Багийн мотор нь өнгөрсөн зун Зарагозагаас 13 саяар ирсэн аргентин залуу. Милито одоо хар захад 16 саяар үнэлэгдэн буй. Лигийн мэргэн буучаар тодрох магадлал өндөртэй яваа. Барсад бүтэлгүйтэж байсан ч энд маш сайн идээшсэн Мотта ч мөн өндөр үүргийг хүлээж, тэр чинээгээрээ сайн тоглож байгаа.
Багийн үнэлгээ – 82 сая
Дундаж цалин – 3,5 сая

Эншэдэ

Хүмүүс энэ багийг Английн коуч асан МкКларены баг, Шалькег саяхан хожсон, Шалькегийн Энгэлаар эндээс ирсэн гэх зэргээс нь мэдэх байх. Твэнтэ олон жил Холландын лигийн дунд хавиар явсан ч энэ жил бузгай хүчтэй байна. Аякс, Эйндховен, Файеноордын өмнө 2-р байранд явна. Харин 11 оноогоор тасарсан Алкмаарыг гүйцнэ гэдэг нь юу л бол. МкКларен Английг Евро 2008-оос мултлахад улс даяар түүнийг урвагч мэтээр үзэн хөөсөн. Гэвч тэр энд бас юм чаддаг гэдгээ харуулж буй. Шигшээгийн ирээдүй болох вингер Элеро Элиа нарын залуусыг Швейцарын хашир тоглогч Блайсэ НКуфо нарын ахмад тоглогчидтой хослуулан амжилтыг гаргасаар л явна. УЕФА цомд тэднийг Шалькег хожно гэж бараг бодоогүй, гэвч чадсан. Дараа нь Марсельд харамсалтай байдлаар пеналтигээр ялагдсан билээ. Тэгэхэд аз ивээсэн бол Аякстайгаа одоо таарч байхсан. Ирэх жил гэхдээ илүү сайн амжилт үзүүлэх болтугай.
Багийн үнэлгээ – 38 сая
Дундаж цалин – 1,6 сая

Рубин

ЦСКА, Спартак, Зенит, Москва гэсэн том багуудын өмнө гишгэж тэд намар Оросын аварга болсон. Амжилтын үндэс нь бусад багууд шигээ газрын тосноос ирсэн их мөнгө. 65 саяар баг нь үнэлэгдэж байгаа гэхээр муугүй л үнэлэгдэх тоглогчид. Гэхдээ ЦСКА Зенит гээд л 2 дахин их үнэлэгдэх багууд түрүүлж чадаагүй. Багийн гол хөдөлгүүр нь Сергей Семак. Премиер лиг үздэггүй хүмүүс бол Евро 2008-ын тоглолтоос нь түүнийг таньсан байх. Семакаас гадна Карадениз хэмээх турк тоглогчийн үүрэг ч бас асар их. Тэднийг ирэх жил ЧЛ-т хэрхэн хөл тавьж эхлэх нь вэ гэдгийг л сонжих үлдэв.
Багийн үнэлгээ – 65 сая
Дундаж цалин – 2,5 сая

Малага

Испаничууд Премиер дивизионоо дэлхийн шилдэг лиг гэж нэрлэдэг. Гэвч зөвхөн 2 баг л үргэлж аваргын төлөө өрсөлддөг гэхэд хилсдэхгүй. Барса болон Реалын сүрд бусад нь дарагдах нь элбэг. Гэхдээ УЕФА цомд бол эндээс чанартай багууд их ирдэг. Сүүлийн жилүүдийн Севильягийн амжилт ч үүнийг нотолно. Ирэх жилээс гэхдээ бид нэгэн шинэ царайг харж магадгүй. Энэ бол Малага. Лигидээ санхүүгээрээ доороосоо 5 дахь хямд баг ч гэсэн хүснэгтэд дээрээсээ 6-д бичигдэж байна. ЧЛ-ийн куалигийн ганц эрхийн төлөө Севилья, Атлетико, Депортиво, Валенси гэсэн томчуудтай ана мана л үзэлцэж байгаа. Дуда хэмээх португал эр энэ жил шинээр ирсэн ч аль хэдийн багийн гол хүн нь болоод амжсан. Түүний гайхамшигтай найруулгын хажуугаар Набил Баха гэх асар их ирээдүйтэй залуугийн тоглолт талбайг чимж байна.
Багийн үнэлгээ – 54 сая
Дундаж цалин – 2,2 сая