АНУ-ын Лос-Анжелест зохион явагдаж байгаа уран гулгалтын ДАШТ-ий эхний багц медалийн эзэд тодорлоо. Манай гарагийн шилдэг спортын хосуудын өрсөлдөөнд Германыг төлөөлсөн украин гаралтай Алена Савченко, Робин Шолковы нар түрүүлж өнгөрсөн жил хүртсэн аварга цолоо хамгаалсан байна. Богино хөтөлбөрийн дараа өрсөлдөгчдөөсөө 3 оноогоор давуу явсан Германы хос чөлөөт үзүүлбэртээ 131,18 оноо авч, хоёр гулгалтын нийлбэрээр хувийн дээд амжилтаа шинэчилж, зүй ёсоор тэргүүлжээ. Тэдний ард Туриний Олимпийн мөнгөн медальт, өнгөрсөн жил мөн л хоёрт орж байсан Хятадын хос Дан Жан, Хао Жан нар орсон байна. Гуравт орж, дэлхийн аваргаас анхны медалиа хүртсэн ОХУ-ын Юка Кавагути, Александр Смирнов нар мөнгөн медаль хүртэхэд 0,13-хан оноо дутжээ. Манай хойд хөрш улсын хос дөрвөлсөн сальхов шидэлтийг гүйцэтгэхдээ алдаа гаргасан хэдий ч шүүгчид тэднийг энэ ховор элементийг хөтөлбөртөө багтаасныг нь үнэлсэн байна. 2006 оны ДА Хятадын хоёр дахь хүчтэй хос Чин Пан, Тон Жан нар хоёр дахь жилдээ дараалан медальгүй хоцорлоо.
Спортын хосуудын тэмцээнээс гадна Калифорнид энэ өдөр эрэгтэйчүүдийн өрсөлдөөн эхэлсэн байна. Богино хөтөлбөрийг хамгийн сайн гүйцэтгэсэн тамирчнаар 2007 оны дэлхийн аварга, Европын 3 удаагийн аварга, Олимпийн мөнгөн медальт Францын Бриан Жубер тодорлоо. Тэрээр зохион байгуулагч орны төлөөлөгч Эван Лайсечек-ээс 1,7 оноо илүү авсан бол гуравт орсон Канадын залуу од Патрик Чан Жубер-аас 1,85 оноогоор хоцорч байна. Манай хойд хөрш улсын эрэгтэйчүүдийн хувьд алдарт Евгений Плющенко сонирхогчдын спортыг орхисноос хойш медалийн төлөө өрсөлдөх уран гулгагч одоогоор алга. Оросын аварга Сергей Воронов муугүй гулгалт үзүүлсэн хэдий ч шүүгчид түүний үнэлгээн дээр бага зэрэг гар татсанаар зөвхөн 9-р байранд оруулжээ. Эрэгтэйчүүдийн ганцаарчилсан төрлийн медалийн эзэд Баасан гарагийн өглөө тодорно.