Мэргэжлийн сумогийн 2009 оны хаврын башё буюу хару башёгийн 12 дахь өдрийн барилдаан тун сонирхолтой боллоо. Котомицуки их аварга Асашёорюүтэй хүч үзлээ. Тачиайн дээр давуу байдал олж авч чадсан Котомицуки их аваргыг маань ёрикири мэхээр давснаар их аваргад хоёр дахь ялагдлыг нь хүлээлгэж хүнд байдалд оруулж байна. Энэ нь Котомицукигийн хувьд Монгол бөхчүүдтэй барилдсан сүүлийн 33 барилдааны дөнгөж хоёр дахь нь болсон гэдгийг онцлох хэрэгтэй байх. Хакухо ч өрсөлдөгч Харумафужиг давснаар Аса аваргаас хоёр давааны илүү боллоо.Өнөөдөр Харумафужигийн 400 дэх дээд зиндааны барилдаан байсан юм.

Хомашо өөрийн ялалтын цувралаа Чиёхакухог даван долоо болгон үргэлжлүүлж байна. Ингэснээр 9-3 болж гуравдугаар байранд ганцаараа бичигдэж эхэллээ. Котоошю цол нэгт Кайо арсланг төвөггүй ялж качи-коши буюу тавин хувиа хийсэн бол Орос легионер Аран Дэжимаг уватедашинагэ мэхээр ялан найм дахь даваагаа авав. Өнөөдөр Тосаноуми Точиношинд унаснаар макүүчигийн 600 дахь ялагдлаа хүлээж ер нь жүрё руу унах өндөр магадлалтай болж байна. Гэхдээ тэр дахин нэг ялвал нийт ялалтын тоогоор Акэбонэг гүйцэж 19-р байранд бичигдэх боломжтой болно.

Экс озэки Миябияма озэки Чиётайкайг ялснаар өөрийн карьер дахь 900 дэх тулаандаа 501 дэх ялалтаа авлаа.

Мөн макүшита зиндаанд манай бөх Дайюубу 5 даваатай тэргүүлэгчдийн эгнээнд бичигдэж байна.