Ирсэн : Франсис Кокуелин (Левалуа), Аарон Рамсей (Кардифф Сити), Самир Насри (Марсель), Амаури Бищофф (Вердер Бремен), Майкл Силвестр (МанЮ), Карлос Вела (зээлээс эргэн ирсэн)

Явсан : Матьеу Фламини (Милан), Иенс Леманн (Штутгарт), Керреа Жилберт (Лэйстер Сити- зээл), Александр Хлеб (Барселона), Жилберто Силва (Панатинайкос), Винсент ван ден Берг (Зволле- зээл), Жастин Хойт (Миддлсборо), Хавард Нордвейт (Саламанка- зээл), Насер Барасите (Дерби Каунти зээл), Арманд Траоре (Портсмут- зээл), Филип Сендерос (Милан зээл)

өвлийн цонхоор хийсэн наймаанууд

Ирсэн : Андрей Аршавин (Зенит)

Явсан: Руй Фонте (Кристал Палас- зээл), Рене Стир (Гиллингэм- зээл), Абу Огого (Барнет- зээл), Пол Рожерс (Нортхэмптон таун – зээл), Гавин Хойт (Уотфорд- зээл), Жэй Симпсон (Уэст Бромвич зээл), Хенри Лансбури (Сканторф Юнайтед – зээл)

Арсен Венгерийн цэргүүд өнгөрсөн 2007-2008 оны улиралд гайхалтай тулалдаж лигийн хүснэгтийг 9 сараас, 3 сар хүртэл тэргүүлсэн билээ. Ийм их хүчин чармайлт гаргасныхаа төлөө тэд Премьер лигийн аварга цолыг хүртэх бүрэн эрхтэй байсан ч улирлын төгсгөлийг муу хийснийхээ гайгaaр Улаан чөтгөрүүдэд цомоо харамсалтайгаар алдсан. Гэвч тэдний азгүйтэл үүгээр дууссангүй. Багийнхаа төвийн шугамыг авч явдаг асан Хлеб, Фламини нар Лондонг орхиж, тэдэнтэй хашир туршлагатай хаалгач Леманн, хамгаалалтын лидер Жилберто Силва нар нэгдсэн нь Венгерийг зуны солилцоо наймааны цонхоор нилээдгүй ажил амжуулах шаардлагатай болгосон юм. Хэвлэл мэдээллийнхэн болон шинжээчид үзэхдээ Арсеналд туршлагатай төвийн ар болон төвийн хагас хамгаалагч хэрэгтэй гэлцэж байсан бөгөөд Гүүнерүүд ч багаасаа олон сайн тоглогчтой гэрээ байгуулахыг хүлээж, шаардаж байлаа. Гэсэн ч энэ бүхнийг үл харгалзан Арсен Венгер өөрийнхөөрөө зүтгэсэн юм. Тэрээр өндөр үнэтэй, нэрд гарсан одуудаас илүү авьяас чадвар нь дөнгөж тодорч буй залуу тоглогчдоор багаа бүрдүүлэхийг илүүд үзсэн билээ. Үүнд мэдээж хэрэг Буучдын хөрөнгө санхүүгийн хязгаалагдмал байдал нөлөөлсөн боловч Арсений зөрүүд гөжүүд зан нь голлох үүргийг гүйцэгтгэсэн нь тодорхой.

Аарон Рамсей

Дөнгөж гарч ирж буй залуу тоглогчдыг багтаа авчирч супер од болгодог Венгерийн бас нэгэн гайхалтай ”бүтээл”. Арсеналаас гадна МанЮ түүнийг ихэд сонирхож байсан бөгөөд бүр манай ирээдүй хэмээн зарлаж байлаа. Харин энэ хооронд Венгер өөрөө Кардиффт очиж гэрээ байгуулах талаар эцэг эхтэй нь ярилцсанаар Ааронг багтаа авч чадсан гэдэг. Дээрээс нь залуу тоглогчдод бусад багуудаас илүү боломж олгодогт нь Рамсей татагдсан байх. Юу ч гэсэн тэрээр Лондонд ирээд олны бодож байснаас ч илүү их амжилтанд хүрээд байна. Ердөө 18-хон настай жаал гэхэд Арсеналын гараанд багтаж 9 тоглолтонд оролцоод зогсохгүй (одоогоор нийт 20 тоглолтонд оролцсон), Аваргуудын лигт Фенербахчегийн эсрэг гоолдоно гэдэг бахадмаар амжилт биш гэж үү. Мөн үүн дээр Уэльсийн шигшээд багтсаныг ч дурьдах нь зүйтэй. Энэ бүхнээс үзэхэд түүний төлөө зарсан 5 сая фунт хэдэн жилийн дараа 50 болсон байхад гайхаад байх зүйл үгүй биз ээ. (үнэлгээ +3)

Самир Насри

Хэдийгээр Насри Евро 2008-д хоёр тоглолтонд оролцож, 2007 оны Францын шилдэг залуу тоглогчоор тодорч, Олимпик Марселийг Аваргуудын лигт шалгаруулахад голлох үүргийг гүйцэтгэсэн ч түүний нэр Англид төдий л танил байсан нь нууц биш. Францын шигшээн ирээдүй гэгддэг түүнийг Александр Хлебийг орлуулахаар Венгер авчирсан ч эхний тоглолтоо хийх хүртэл нь Арсеналын фенүүд эргэлзсээр л байлаа. Гэвч энэ бүх үл итгэх байдлыг Насри, Уэст Бромвичийн эсрэг хийсэн лигийн эхний тоглолтонд л бутцохисон. Тоглолт эхлээд ердөө дөрөвхөн минут өнгөрч байхад тэрээр эсрэг багийнхаа хаалгыг мялаасан бөгөөд энэ нь цаашдаа бидэнд асар их хэрэг болох тоглогч байна даа гэдгийг Буучдад хангалттай ойлгуулж өгсөн байх. Франц эрийн гайхамшиг үүгээр дууссангүй. Лигийн хүчтэй өрсөлдөгч Манчестер Юнайтедийн эсрэг дубльдэж, багаа 2 : 1-р ялахад голлох үүргийг тэр гүйцэтгэснээрээ тэр Гүүнерүүдийн хайрыг улам ч ихээр татах болсон юм. Яг л Хлебийн адил овсгоо самбаатай, гайхалтай ур чадвартай энэ залуу магадгүй зарим талаараа Хлебээс ч илүү байж болох юм. Одоогоор Насри 35 тоглолтонд оролцохдоо 7 гоолоор өрсөлдөгчийнхөө хаалгыг мялаагаад байгаа ба Хлеб 3 жил Арсеналд зүтгэхдээ 10 гоол л оруулсан нь үүнийг батлах мэт. (үнэлгээ +4)

Майкл Силвестр

Венгер түүнд тийм их итгэл хүлээлгэж авчирсан нь юу л бол. Ерөнхийдөө олны хэл амыг дарах гэж л энэ наймааг хийсэн байх гэж зарим мэргэжилтнүүд дүгнэсэн нь үнэн ч юм шиг. Тэр төвийн хамгаалагч, Премьер лигт олон жил тоглосон туршлагатай гээд л. Арсеналд ирсэн эхний хэдэн долоо хоногтоо Майкл гэмтлийн эмнэлгээр ”тэнэсээр” таарсан бол дараа нь бас л жижиг бэртэл аваад тулалдааны талбараас гарчихсан. Гэхдээ энэ хоорондоо цөөнгүй тоглолтонд оролцож багтаа чамгүй тус болсныг нь үгүйсгэх аргагүй. Ялангуяа заналт дерби Тоттенхэмийн хаалганд мөргөж хийсэн гоол нь буучдыг чамгүй баярлуулсан нь лавтай. Одоогоор нийт 16 тоглолтонд оролцоод байгаа ба дахиад бэртэл авчихгүй бол улиралын төгсгөлд багтаа тус болох л тоглогч. (үнэлгээ 2)

Карлос Вела

Вела анх 2007 оны оны өвөл Арсеналд ирж байсан ч гараанд багтах магадлал бага байсан тул Саламанка, Осасуна зэрэг багуудад зээлээр тоглож байгаад өнгөрсөн зун Лондонд эргэн ирсэн билээ. Бөмбөг эзэмших чадвар, хурд зэргээрээ үеийнхэн дундаа илт ялгардаг түүнийг ирээдүйд Арсеналыг авч явна гэхэд хэн ч эргэлзэхээ больжээ. Улирал эхэлснээс хойш нийт 17 тоглолтонд оролцсон ба үүний есөд нь гараанд багтаж тоглсон байна. Мөн таван гоолоор багтаа тус хүргэсэн бөгөөд үүний гурвыг нь Шеффилд Юнайтедтэй хийсэ Карлинг цомын тэмцээнд хийсэн гэдгийг та бүхэн мэдэж байгаа байх. (үнэлгээ +3)

Андрей Аршавин

Яахын аргагүй энэ улирлын буучдын хийсэн хамгийн сайн наймаа. Зөвхөн өндөр үнээр ирсэн болохоор ч ингэж хэлж байгаа юм биш. Түүнд яг Арсеналд хэрэгтэй, дутгагдаж байсан бүх чанарууд байгаа болохоор тэр. Андрей талбайг мэдрэх төрөлхийн авьяастай бөгөөд үүнийг ашиглан ямар ч зайнаас маш оновчтой дамжуулалтыг багийнхандаа гаргаж өгдөг. Мөн гайхалтай ур чадвартай, ухаалаг тоглолттой, хурдтай гээд л. Хамгийн гол нь түүний нэр хүнд, алдар цуу нь багийн сэтгэлзүйг өргөж эргэн тулааны талбарт ороход нь тусалж байна. Хэдийгээр тэр шинэ багтаа дөнгөж 7-хон тоглолт хийгээд байгаа ч энэ бүхэн хэдийнэ тодорхой болсон. Андрeйгийн наймааны ганц сул тал нь түүний Аваргуудын лигт оролцож чадахгүйд л байна. Гэхдээ баг нь энэ жилдээ Аваргуудын лигийн эрхээ авчихвал дараа жил түүнд дэлхийн шилдэгүүдтэй өрсөлдөх боломж олдох нь дамжиггүй. (үнэлгээ 5)

Амаури Бищофф

Цомын тэмцээнд гурван удаа сэлгээгээр гарсан нь түүний ур чадварыг хангалттай харуулж чадаагүй ч Вердерт байхдаа тэр өөрийгө ямархуу тоглогч вэ альхэдийнэ баталчихсан. Харамсалтай нь бэртэл гэмтэл хэмээх аюулт дайсан Бищоффын Арсенал дахь карьерт заналхийлж байна. Амаури Францад төрсөн бөгөөд одоо Португалийн Under-21 шигшээд харьяалагддаг. Магадгүй ирэх улиралд түүнд боломж олдох байх. (үнэлгээгүй)

Франсис Кокуелин

Францын доод лигээс ирсэн энэ залуу улирал эхэлснээс хойш ганцхан удаа л талбайд гарчээ. Одоогоор нөөц багийн бүрэлдэхүүнд багтаж байгаа ба цэвэрлэгчийн байрлалд тоглодог аж. (үнэлгээгүй)

Эндээс харахад тэдний хийсэн ихэнх наймаа сайн үнэлгээтэй байгаа ч орхиж боломгүй хэд хэдэн зүйл байна. Юуны өмнө өнгөрсөн зун багаа орхисон Фламини, Жилберто нарын орон зайг орлох сайн тоглогчид авсангүй. Дэндүү залуу, туршлагагүй бүрэлдэхүүн нь улирлыг амжилт муутай үргэлжлүүлж буйн гол шалгтаан. Мөн хамгаалалт урьдын адил эмзэг хэвээр байна. Гэхдээ энэ улиралдаа тэд Аваргуудын лигийн эрхтэйгээ үлдэж чадвал, Арсеналын ирээдүй гэрэлтэй харагдаж байна. Ирэх жил гэхэд залуу авьяастнууд нь илүү туршлага сууж, тоглолт нь ч тэр чинээгээрээ сайжрах нь тодорхой. Тиймээс 4 гэсэн үнэлгээ өгч байна.