Роман Абрамовичид худалдагдсанаас хойшхи таван жилд Челси наймааны зах дээр шуугиан тарилгүй өнгөрч байсан нь үгүй. Харин өнгөрсөн зуны хувьд ноён Абрамовичийн түрийвч нимгэрсэнтэй холбоотой юу эсвэл түүний Челсиг гэх сэтгэл хөрсөнтэй холбоотой юу ямар ч гэсэн урьд өмнөх жилүүдээсээ харьцангүй бага мөнгийг шинэ тоглогч авчрахад зарцуулсан билээ. Тэдний хийсэн наймаа нь тэр чигээрээ Португаль тоглогчид байгаа нь гарцаа байхгүй Сколаригийн шахалтаар хийгдсэн зүйл. Гэхдээ Сколарид найдсанаараа Роман ч тэр, Челсигийн фенүүд ч тэр бүгдээрээ хулхидуулж, маш их хохирол амссан нь үнэн. Зөвхөн мөнгөн дүнгээр л гэхэд Сколариг явуулахын тулд Челси 10 сая фунт түүнд төлсөн бөгөөд мэдээж түүний авчирсан гутамшигтай ялагдлууд нь үүний хажууд юу ч биш.

Ирсэн : Жосе Босингва (Порту); Деку (Барселона); Минэйро (Үнэгүй); Рикардо Куарежма (Интер- зээл).

Явсан : Бен Саха (Портсмут- зээл); Эрнан Креспо (Гэрээ дууссан); Райн Бертранд (Норвич- зээл); Стив Сидвэл (Астон Вилла); Клод Макелеле (ПСЖ); Таль Бен Хайм (Манчестер Сити); Клаудиа Пизарро (Вердер Бремен зээл); Андрей Шевченко (АС Милан); Шон Райт-Филипс (Манчестер Сити); Жэк Корк (Уатфорд зээл); Уэйн Бридж (Манчестер Сити); Карло Кудичини (Тоттенхэм).

Босингва

Довтолгоонд оролцох дуртай , хурдтай, авьяаслаг энэ залуу хамгаалагчийн Челси дэх эхлэл яах аргагүй сайхан байсан. Түүний тоглолт Стэмфорд Бриджэд шинэ уур амьсгалыг авчирч тоглолтын хэмнэлийг бүхэлд нь өөрчилж чадсан билээ. Мэдээж Сколари нутаг нэгт залуудаа боломжийг харамгүй олгож байсан нь үүнд нөлөөлсөн. Гэхдээ түүний хувьд бүх зүйл төгс сайхан байсан гэвэл эндүүрэл болно. Жосе хэтэрхий түргэн ууртай, сэтгэлийн хөдлөлөө барьж чаддаггүйгээс гадна эцсийн мөчид гаргадаг шийдвэр нь үргэлж буруу байдаг. Мэргэжилтнүүд ч үүнтэй санал нэгддэг. Гэхдээ сүүлд Астон Виллатай тоглоход Босингва, Эшли Яангийн эсрэг үзүүлсэн тоглолтоороо дээрхи шүүмжлэлүүдийг бүдгэрүүлж чадсан билээ. Түүнийг ирэх улиралд илүү сайжирч багийнхаа амин сүнс болно гэдэгт эргэлзэхгүй байна. (Үнэлгээ 4)

Рикардо Куарежма

Ла лиг, Сери А-гийн аль алинд нь бүтэлгүйтсэний дараа Рикардог Премьер лигт дасан зохицож чадах эсэхэд нь олон хүн эргэлзэж байлаа. Гэтэл санасныг бодвол тэр үнэхээр давгүй тоглож байна. Хэтэрхий шоу хийлгүй хэрэгтэй үед нь бөмбөгөө дамжуулж, хурд болон ур чадварынхаа ачаар хамгаалагчдаас төвөггүй мултарч чадаж байгаагаас нь харахад түүнийг Челсид сайн тоглож байна гэж дүгнэж болохоор байна. Ирснээсээ хойш багийнхандаа хэд хэдэн гоолын дамжуулалт өгч, фенүүдийн талархлыг хүлээгээд байгаа Португаль эрд +3 оноо өгч байна.

Деку

Бразил, Португаль, Испани зэрэг нарлаг цаг агаартай орнуудад карьерийн ихэнх жилүүдээ өнгөрөөсөн Декугийн хувьд бүрхэг Англи орон тийм ч таатай сэтгэгдлийг үлдээсэнгүй. Челсид ирсэн эхний саруудаа Деку нилээдгүй хичээж Лампс, Баллак нараас илүү гарахыг хичээж байсан ч бэртэл гэмтэл түүний саад саад болсон юм. Одоо 31 настай Декү Цэнхэрүүдийн төлөө өөрөөсөө шалтгаалах бүхнээ хийсэн хэмээн мэдэгджээ. ”Би уучлал гуйхыг хүсэхгүй байна. Уг нь Деку гэж хэн бэ гэдгийг Англичуудад харуулаад өгье гэж бодсон боловч энэ бэртлээс болоод бүх зүйл нурчихлаа. Ийм зүйл тохиолдоогүй байсан бол би тэдэнд хэрэг болох байсан нь тодорхой шүү дээ”. Улирлын эхэнд Портсмутын хаалганд 40 орчим яардаас хийсэн гоолыг нь түүний Челси дэх карьерийн оргил мөч гэж болох юм. (Үнэлгээ 2)

Минейро

Түүний байранд тоглодог Майкл Эссьен улирлын дундуур бэртэл авсан ч Минейро банзанд суусаар улирлыг дуусгаж байна. Яахав ганц хоёр тоглолтонд дажгүй тоглосныг нь үнэлж болох ч 33 настай түүнд Англи орон зохихгүй гэдэг нь харагдаж байна. Үнэгүй ирсэн болохоор түүний наймаанд муу гэсэн үнэлгээ тавьж болох ч, Челсигээс долоо хоногт 30.000 фунтын цалин авч буйг нь бодолцоод 2 гэсэн үнэлгээ тавьж байна. Мөн идэвхи чармайлтынх нь төлөө + үнэлгээ нэмэх нь зүйтэй болов уу. (Үнэлгээ +2)

Робиньог хамар дороосоо алдсан нь тэдний наймааны зах дээр хийсэн гол алдаа гэж мэргэжилтнүүд дүгнэж байна. Учир нь Бразил эрийн Ситид үзүүлж буй гайхалтай тоглолт нь Челсигийн фенүүдийн голыг харлуулж буй нь лавтай. Сколаригийн нутаг нэгтнүүдээс Босингва л гайгүй явж байгаа ба Деку, Куарежма хоёр ид шидээ үзүүлэх болоогүй л байна. Шинэ дасгалжуулагч Гуусын удирдлаган дор Челсигийн амжилт эрс дээшилсэн ч, Сколари шиг нутгийнхандаа ээлтэй хандах нь юу л бол. (Үнэлгээ +3)