Америк хөлбөмбөгийн амьд домгуудын нэг Жон Мадден зодог тайлснаа зарлалаа. Тэр тоглогч хийж биш, дасгалжуулагч хийж биш телевизээр америк хөлбөмбөгийн тоглолтыг тайлбарлан домог болж чадсан юм. Дасгалжуулагчийн хувиар Супер Боул хүртэж явсан тэр телевизийн тайлбарлагч, аналист болсноор тэр энэ төрөлдөө хамгийн шилдэг нь болсон юм. Түүнийг сүүлийн гучин жилийн хамгийн шилдэг мэргэжлийн спорт тайлбарлагч хэмээн бүх экспертүүд хүлээн зөвшөөрдөг.

Тэр хамгийн шилдэг тоглолтуудыг тайлбарлан, хамгийн шилдэг анализ, дүгнэлтүүдийг хийн, хамгийн өвөрмөц үгнүүдийг “хит” болгодог байжээ. Тэр мөн нисэхээс айн байнга автобусаар явдаг өвөрмөц нэгэн. Түүний хамгийн сүүлчийн тайлбарласан тоглолт нь Аризона болон Питтсбург багуудын хооронд болсон Супер Боул байжээ.

Тэр өдгөө 73 настай ба өөрийгөө цаг нь болсон гэж үзэн гавьяаны амралтаа аваад энэ намар эхнэртэйгээ хуримын 50 жилийн ойгоо тэмдэглэнэ гэжээ.

Түүний “Madden NFL Football” компьютер тоглоом нь бүх цаг үеийн хамгийн их зарагдсан тоглоом болж, өөрөө 2006 онд Алдрын танхимд элсэн орж байв.