ҮСБХ-ны 2008-2009 оны улирлын шилдэг хамгаалан тоглогчоор Орландо Мэжик багийн төвийн тоглогч Дуайт Ховард тодорлоо.

23 настай Ховард энэ шагналыг хүртсэн лигийн түүхэн дэх хамгийн залуу тоглогч болж байна. Өмнөх хамгийн залуу хамгаалан тоглогч нь Элвин Роберстон байсан бөгөөд Ховард түүнээс 5 сараас “нялх” ажээ.

Сагсан бөмбөгөөр дагнан бичдэг 119 сэтгүүлч, аналистуудын  105 нь Ховарлыг  1-рт нэрлэжээ. Нийт 542 оноо авсан түүний араас 148 оноогоор ЛеБрон Жеймс, 90 оноогоор Дуэйн Уэйд нар тус тус бичигдсэн байна.

“Супермэн” энэ улиралд  дунджаар 13.8 самбараас авалт, 2.9 блок хийж лигийг тэргүүлсэн юм. Тэрээр лигийг нэг улиралд самбараас авалт, блок шотоор зэрэг тэргүүлсэн 5 дахь тоглогч болжээ.  Түүнээс өмнө Билл Уолтон, Карим Абдул Жаббар, Хаким Олажьювон, Бен Уоллес нар ийм амжилт үзүүлж байж.

Ховардын тэргүүлсэн Орландо Мэжик энэ улиралд 59 хожиж, 2 дахь жилдээ дараалан дивизионыхоо аварга болсон юм. Мэжик 1995-96 оны улиралд буюу Шакил, Пеннигийн үед 60 хожиж байсан нь багийнх нь түүхэн дэх шилдэг амжилт бөгөөд энэ улиралд тэрхүү амжилтыг давтахад ердөө 1 хожил дутжээ.

“23 настайдаа шилдэг хамгаалан тоглогч болно гэдэг үнэхээр гайхалтай. Агуу тоглогч нар ихэвчлэн кареерынхаа сүүл рүү  сайн хамгаалдаг болдог. Ховардад дахин сайжрах маш их нөөц, боломж байгаа” хэмээн түүний дасгалжуулагч Стэн Ван Ганди хэлсэн байна.

Сүүлийн 1 жилийн дотор Дуайт олимпийн наадмын алтан медаль хүртэж, 5000 самбараас авалт хийсэн хамгийн залуу тоглогчийэ алдрыг Уилт Чамберлинээс булааж, 3 дахь удаагаа Бүх оддын тоглолтонд оролцсон амжилтуудыг үзүүллээ.