“Бүдүүн” хэмээн гоочлуулж, бүтэн жилийн турш гэмтлийн улмаас талбайд гараагүй ч гэсэн Роналдо их хөлбөмбөгтөө эргэн ирээд хоёр сар болж байна. Түүний амьдрал амжилт, гэмтэл, асар олон гоал, мөн үзэсгэлэнт бүсгүйчүүдээр “шаваастай”. “Барса”, “Интер”, “Реал”, “Милан” зэрэг агуу багуудыг дамжиж, дэлхийн аваргын бүх цаг үеийн мэргэн буучаар тодорсон түүний амьдрал үлгэртэй төстэй. Тэр одоогоор “Коринтианс”-т алба хашиж байна. Амжуулаад бас зургаан гоал хийчихсэн. Өнөөх айхавтар таргаасаа 8 кг-ийг нь гээчихсэн. Ирэх жил аягүй бол Өмнөд Африкийг зорино гээд зогсож байж мэдэхээр л байгаа. Английн сэтгүүлчийн хэд хэдэн асуултад түүртэхгүй хариулж байсан эр маань сайхан бүсгүйн тухай лавлахад удтал эргэцүүлжээ. Түүний сул тал хүүхнүүд гэдэг нь үүн дээр хүртэл илэрч л байх юм. Ингээд Английн нэгэн сэтгүүлчид өгсөн ярилцлагыг нь танд хүргэе.

- Багадаа хөлбөмбөгчдөөс хэнийг шүтдэг байв аа? Пеле, Марадона хоёрын хэн нь мундаг вэ? Бразилд Гарринчаг Пелегээс илүү хүндэлдэг гэдэг үнэн үү?

- “Фламенго” болон шигшээ багийн агуу тоглогч Зиког шүтэж өссөн. Аав минь “Фламенго”-г дэмждэг байсан болохоор энэ багийн тоглолтыг үзэж, агуу Зиког дэмжих болсон. Тэр маш техниктэй, гоалтай, гайхалтай дамжуулалттай байсан шүү. Хоёр дахь асуултад тань би бразил хүн гэдгээ сануулья. Энэ нь өөрөө хариултыг тодорхой болгож байгаа биз. Харин Гарринчагийн тоглож байгааг би нүдээрээ яг хараагүй л дээ. Гэхдээ түүнийг элэг нэгтнүүд маань одоо хүртэл шүтдэг.

- Та цагтаа нэрээ Роналдиньогоос Роналдо гэж өөрчилсөн. Гэтэл хожуу бас нэгэн залуу хөлбөмбөгчин Роналдо гэдэг нэрээ Роналдиньо гэж сольсон. Ингэж нэрээ солих ямар хэрэг байв?

- Үнэн хэрэгтээ би өөрөө нэрээ огт солиогүй шүү дээ. Намайг багаас маань л Роналдо гэж дууддаг байсан. Харин өсвөр насанд хүмүүс Роналдиньо буюу “Жижиг Роналдо” гэж дуудах нь ихэссэн. Ийм л учиртай. Тэгээд хожим нь том болоод нэрээ эргүүлэн олсон юм.

- Та “Барселона”-д орчуулагчаар ажиллаж байсан Моуриньог санаж байна уу. Тэр тэгэхэд л “Ганц өвөрмөц” чигээрээ байсан болов уу?

- Бид ажил хэргийн тун сайн харилцаатай байсан. Тэр үед тэр тун дажгүй залуу санагдсан. Харин одоо мэдэхгүй юм даа. Ойрд ч таараагүй юм байна. Тэгээд ч он жилүүд хүнийг их өөрчилдөг шүү дээ. Гэхдээ урьдын дажгүй залуу хэвээрээ байгаа байлгүй дээ.

- Тэгвэл Бобби Робсон та хоёрын харилцаа хэр байсан бэ. Тэр таныг “Ньюкасл”-д ир гэж ятгасан гэдэг үнэн үү?

- Испанид Робсон бид хоёр онцгой сайн харилцаатай байсан. Тэнд хөлөө олоход их тус болсон хүн дээ. Ер нь би “Барселона”-д байхдаа хамгийн сайн тоглож байсан гэж боддог. Харин Ньюкаслын тухай санаж буй зүйл алга. Робсон намайг ятгаагүй санагдана.

- Англид тоглоогүй тань ямар шалтгаантай юм бэ?

- Англид очиж тоглох нөхцөл боломж ердөө гарч ирж байгаагүй шүү дээ. Тэнд тоглоогүй нь жаахан харамсалтай л хэрэг. Магадгүй тэнд тоглолт маань тохирох ч байсан юм билүү. Гэхдээ би хөлбөмбөгчний замналдаа сэтгэл хангалуун явдаг хүн. Итали, Испанийн шилдэг лигт тоглосон маань хангалттай.

- Хамтран ажилласан дасгалжуулагчдаас хэн нь хамгийн шилдэг вэ?

- Олон дасгалжуулагчдаас нэгийг нь сонго гэвэл Загало л юм даа. Тэр маш мэдрэмжтэйгээс гадна хүн чанарын хувьд алт шиг хүн.

- Тэгвэл таны тоглож байсан Бразилын шигшээ багийн аль үе нь илүү хүчирхэг байсан бэ?

- 2002 оны Дэлхийн аварга баг. Ривалдо, Роналдиньо, Кафу, Роберто Карлос тэгээд би…Бид ямар ч үед тоглолтыг хүссэнээрээ эргүүлж, гоал оруулах боломжийг байнга гаргах чадвартай байсан. Тиймээс ч бид долоо тоглохдоо долоо хожсон юм.

- Миланчууд таныг хоёр жилийн турш тордож, хөл дээр тань босгосон. Гэтэл та тоглох боломжтой болмогцоо л “Реал” руу явчихсан. Энэ шударга явдал гэж үү?

- Байдал миний хүссэнээр шийдэгдээгүй шүү дээ. Хүмүүс мэднэ дээ, би хэзээ ч тэндээс явья гэж ам нээж байгаагүй юм. “Интер” л намайг зүгээр зарчихсан.

- Стив Макманаман таныг гольф тоглож байхдаа хошин юм яриад бас булхайцах гээд байдаг гэж ярьж байсан. Агуу хөлбөмбөгчин тийм жижиг тоглоом дээр булхайцах дэмий юм биш үү?

- /инээснээ/ Үгүй яахав дээ, би тоглож байхдаа ярих дуртай л байхгүй юу. Ер нь гольф тоглож байхад инээдтэй юм ярьж марзганах сайхан шүү дээ. Гэхдээ би зарим үед дуугарахгүй байх ёстойг нь мэднэ л дээ. За тэгээд элдэв булхай хэрэглээгүй ч гэсэн би хожиж чадна даа.

- Дэвид Бекхэм танай усан бассейнд орох их дуртай байсан гэдэг. Та хоёр тийм лут найзууд уу?

- Бид одоо ч байнга харилцаатай байдаг. Би англиар сайн ярьж чаддаггүй ч гэсэн маш сайн ойлгодог. Дэвидийг Мадридад ирэхэд ч их тусалсан. Гэр бүлээрээ найзалж, тун дотно болсон. Багийнхаа бразил андуудаасаа ялгахааргүй л нөхдүүддээ.

- Аль улсын бүсгүй хамгийн сайхан бэ. Бас британи эмэгтэйчүүдийн тухай юу хэлэх вэ?

- /удаан бодолхийлснээ/ Бразил бүсгүйчүүд сайхан юм байна аа. /дахиад бодсноо/ харин дараа нь швед бүсгүйчүүд гэж хэлье. Гуравт гэвэл, колумб бүсгүйчүүд. Харин британи бүсгүйчүүдийн талаар сайн хэлж мэдэхгүй байна аа. Англид цөөхөн очдог шүү дээ. Гэлээ ч Лондон их сайхан хот шүү.

- Пүүзээ ханын хадаасанд өлгөчихөөд юу хийе гэж бодож байна даа?

- Өнгөрснөө дурсаж, амьдралын аз жаргалд умбана гэж бодож байна. Ямар ч алба, үүрэг гэж үгүй болно шүү дээ! Хөлбөмбөг тоглохоо больсны дараа өдрийн хуваарь гаргахгүй гэж бодохоор үнэхээр сайхан санагддаг. Энэ л намайг аз жаргалтай болгодог доо.