Манчестер Юнайтед болон Ирландийн шигшээ багийн ахлагч асан Рой Кин Английн хөлбөмбөгийн дэд дивизионы Ипсвич багийн менежер буюу дасгалжуулагч боллоо.

Кин өнгөрсөн 12-р сард Сандерландын менежерийн албанаас халагдаад түүнээс хойш ямар нэгэн багтай холбоогүй байсан бөгөөд Ипсвич энэ Лхагва гаригт Жим Мэгилтоныг халаад менежергүй болоод байв. Ингээд Кин доод дивизионы багтай 2 жилийн гэрээ хийлээ. Киний эхний зорилго багаа Премьер лигт оруулах байх нь мэдээж.

Рой Киний түүхээс:

1971:  8 сарын 10-нд Коркт төрсөн.

1987: Ирландын хагас мэргэжлийн лигийн Коб Рамблерст элсчээ.

1990: Ноттингэм Форестэд 10 000 фунтээр ирэв.

1991: Даблин хотод шигшээ багтаа анхны тоглолтоо Чилийн эсрэг хийж, тоглолт 1:1-ээр өндөрлөжээ. .

1992: Ноттингэмийн шөнийн клубт танхайрснаас болж баривчлагджээ. Гэхдээ ямар нэгэн ял шийтгэл авалгүй суллагдсан байна.

1993: 1-р сар: Бас нэгэн шөнийн клубт болсон зодоонд оролцож, клубээс хөөгдөн гарсан байна.

7-р сар: Манчестер Юнайтед багт 3.75 сая фунтээр Ноттингэмээс худалдагдан ирж, Британий хөлбөмбөгийн рекорд тогтоожээ. Ноттингемд Кин 154 тоглож, 33 гоол хийгээд байлаа.

1994: Юнайтедэд эхний улиралдаа тоглож, лиг болон ФА-ын цомд анх удаа зэрэг түрүүлэхэд нь тусалжээ.

1995: Кареертаа анх удаа талбайгаас хөөгджээ. ФА-ын цомын хагас шигшээгийн хариу тоглолтонд Кристал Паласийн тоглогч Гарет Соутгэйтийг дэвссэн байна. Дараа нь Кин 5000 фунтээр торгуулжээ.

1995-96 оны улирлын эхний 3 сард дахин 2 ч удаа талбайгаас хөөгджээ.

1996: 3-р сар. Шигшээ багтаа хийсэн 30 дахь тоглолтондоо талбайгаас хөөгджээ. Ирландын шигшээ ОХУ-ын багийн эсрэг хийсэн тэрхүү тоглолт Мик Макартигийн шигшээ багаа удирдсан анхны тоглолт нь байв.

5-р сар. Багтайгаа хамт 2 дахь удаагаа дабл хийжээ. ФА-ын цомын шигшээд Ливерпулыг 1:0-ээр хожсон байна. Шигшээ багийнхаа дасгалжуулагч Макартитай зөрчилдөж эхэлжээ.

1997: 4-р сар. Румыны эсрэг тоглолтонд торгуулийн цохилт алдаж олны шүүмжлэлийг ихээхэн хүртэв. Мөн нэг хэрэгт орооцолдсон ч шийтгүүлээгүй мултарч дөнгөсөн байна.

8-р сар. Эрик Кантонагийн үлдээсэн Манчестер Юнайтедийн ахлагчийн туузыг өвлөж авлаа.

9-р сар. Өвдөгтөө гэмтэл авч, улирлын үлдсэн тоглолтуудыг өнжжээ.

1999: 4-р сар. Арсеналын эсрэг хийсэн ФА-ын цомын хагас шигшээгийн хариу тоглолтонд 2 шар хуудас авснаар талбайгаас хөөгджээ. Мөн Аваргуудын лигийн хагас шигшээд Ювентусын эсрэг шар хуудас авснаар Баваригийн эсрэг шигшээ тоглолтонд оролцож чадаагүй юм. Ноу Кампт болсон тэрхүү шигшээ тоглолт Аваргуудын лигийн түүхэн дэх хамгийн шилдэг тоглолтуудын нэг байлаа.

11-р сар. Бразилын Палмейрастай хийсэн  “Toyota Cup”-ийн шигшээ тоглолтын цорын ганц гоолыг хийж, Манчестер Юнайтедийг Тив хоорондын цомыг хүртсэн анхны Британи клуб болгожээ.

12-р сар. Манчестер Юнайтедтэй дахин 4 жилийн шинэ гэрээ хийжээ.

2000: 5-р сар. ПЛ-ийн ээлжит түрүүгээ авахаасаа өмнө Мэргэжлийн хөлбөмбөгчдийн холбоо болон сэтгүүлчдийн зүгээс Кинийг оны шилдэг тоглогчоор тодруулсан байна.

8-р сар. “Charity Shield”-ийн тоглолтыг Челситэй Уэмблид хийхдээ 2 шар хуудас аван талбайгаас хөөгджээ.

2001: 9-р сар. Юнайтедийн тоглогчийн хувиар 9 дэх удаагаа талбайгаас хөөгджээ.

2002: 5-р сар. Дэлхийн аварга шалгаруулах тэмцээнд Ирландын шигшээ багаа ахлан очсон ч дасгалжуулагч Мик Макартитай муудалцан нутаг буцсан байна. Кингүй Ирландийн шигшээ сайн тоглож,  хэсгээсээ шалгаран Испаний шигшээд торгуулийн цохилтоор хожигдож байлаа.

8-р сар. Манчестер Ситигийн тоглогч Хааланд дээр хийсэн таклаа албаар хийсэн, өмнө нь хийнэ гэж бодож байсан гэж өөрийн намтартаа бичжээ.

9-р сар. Сандерландтай 1:1-ээр тэнцсэн тоглолтонд Жейсон МакАтирийг тохойдож ээлжит удаагаа талбайгаас хөөгджээ.

10-р сар. Хааландийн хэргээс болж 150000 фунтээр торгуулж, 5 тоглолтонд оролцох эрхээ хасууллаа.

2003: 2-р сар. Хэдийгээр Ирландын шигшээ багийн шинэ менежер Брайн Керр Рой Кинийг шигшээ багт дуудсан ч үүнийг нь хүлээж авсангүй, дахиж шигшээдээ тоглохгүйгээ мэдэгджээ.

2004: 2-р сар. Аваргуудын лигийн шөвгийн 16-д Портуд хожигдоход улаан хуудас аван талбайгаас хөөгджээ.

4-р сар. Ирландын шигшээд дахин тоглоно гэж мэдэгдлээ.

5-р сар. Макартиг дасгалжуулж байх үеэс хойш анх удаа шигшээдээ тоглолоо. Тэрхүү тоглолт нь Румынтэй хийсэн нөхөрсөг тоглолт байв.

2005: 2-р сар. Арсеналыг 4:2-оор хожихын өмнө хонгилд Патрик Виейратай шөргөөцөлдсөн байна.

8-р сар. Сэр Алекс Фергюсон Кинтэй 7-р сард Португалд улирлын өмнөх бэлтгэл хийж байх үед зөрчилдөж байсан тухайгаа мэдэгдэв.

10-р сар. Шигшээ багаасаа 2 дахь удаагаа зодог тайллаа.

11-р сар. 2 талын харилцан санал нийлснээр Манчестер Юнайтедыг орхилоо.

12-р сар. Шотландын Селтиктэй 18 сарын гэрээ хийв.

2006: 1-р сар. Селтикт анхны тоглолтоо хийсэн ч баг нь 1-р дивизионы Клайд багт шуугиантай хожигджээ.

5-р сар. Селтиктэй хамт улирлыг дуусгалаа. Селтик тэр улирлынхаа Шотландын аварга болсон байна.

6-р сар. Хөлбөмбөгөө орхилоо.

8-р сар. Сандерландын шинэ менежер болов.

2007: 4-р сар. Сандерланд Премьер лигт шууд оролцох эрх авлаа. Дараагийн долоо хоногт нь “Championship”-т түрүүлэв.

2008: 5-р сар. Сандерланд ПЛ-ээс хасагдах багаас 3 онооны илүү байсан тул ПЛ-д үлджээ.

12-р сарын 4. Сандерландыг орхилоо.

2009: 4-р сарын 23. Ипсвичтэй 2 жилийн гэрээ байгуулав.