Монголын Сагсан Бөмбөгийн Холбооны “Сэнгүр” лигийн медалийн төлөөх 2 дахь тоглолтууд СТО-д боллоо.

Хүрэл медалийн төлөөх тоглолт. №2.

ЁЛУУД 98:86 БАЯНЗҮРХ БУЛЛЗ

Ёл: Т. Санчир27 оноо + 11 самбар, Ц. Пүрэвдорж 25 оноо+3 бөмбөг таслалт, М. Цолмонхүү 15 оноо+2 таслалт+2 блок, Э. Ананд 14 оноо+11 самбар

Буллз: Ц. Шаравжамц 21 оноо + 15 самбар, М. Цогтбаатар 15 оноо + 6 самбар, Д. Бат-Орших 13 оноо + 8 самбар

Эхний тоглолтондоо хожигдсон “Ёлууд” эхнээсээ л оноогоор тасарч, тоглолтын туршид тэр давуу байдлаа хадгалсаар цувралын харьцааг 1:1-ээр тэнцүүллээ. Тэдний гараанд гарсан тоглогчид бүгд 10-аас дээш оноо авсан бөгөөд нөөц тоглогчдоо бараг ашигласангүй. Буллзын хувьд улирлыг сайн эхлүүлсэн ч сүүлдээ ядарч байна уу гэмээр харагдаж байна. Багийн гол мэргэн бууч М. Цогтбаатар нь энэ тоглолтонд холын зайн 10 шидэлтийнхээ ердөө 1-ийг нь амжилттай болгожээ. Гэмтэлтэй байгаа “Ёлууд”-ын төвийн тоглогч Б. Мөнхболд энэ тоглолтонд мөн л оролцсонгүй.

Аваргын төлөөх тоглолт. №2.

ХАСЫН ХҮЛЭГҮҮД 93:67 МУИС “МBM”

Хас: Ц. Мэргэн 27 оноо+6 самбар+3таслалт+2 блок, О. Сайнбаяр 23 оноо+15 самбар, М. Отгонмөнх 12 оноо+6 самбар, Д.Бат-Эрдэнэ 11 оноо+9 самбар, А. Од 10 оноо

МУИС эхний тоглолтонд гялалзтал тоглосон ч энэ удаа яачихваа гэмээр муу тоглолоо. Эсрэгээрээ Хүлэгүүд эхнээсээ л довтолгоо, хамгаалалтанд тун нямбай тоглов. Ер нь өнгөрсөн 2 тоглолтноос харахад Хас бэлтгэл дээрээ маш сайн ажиллаж, тоглолтондоо зөв бэлдэж байгаа бололтой. Өнгөрсөн тоглолтонд МУИС-ын залуучууд өрсөлдөгчөөсөө нуруугаар намхан ч энэ дутуу байдлаа хурдан довтолгоо, хурдан шилжилтээрээ нөхөж чадаж байсан нь хожлынх нь үндэс байсан байх. Энэ удаа тийм байдал харагдсангүй. Нэгэнт оноогоор хол хоцорсон МУИС-ын багийн дасгалжуулагч тоглогчдоо сольж байсан ч тоглолтын арга барилаа өөрчилсөнгүй. Миний бодлоор МУИС-ын баг довтолгоонд маш хурдан шилжиж, өндөр хамгаалагчдын эсрэг заслонтой, хөдөлгөөнтэй, олон дамжуулалтай довтолвол илүү үр дүнтэй байх болов уу. МУИС-ын багт Г. Ихбаяр, Г.Баттөр гээд довтолгооныг хурдан эхлүүлж чадах хурд, мэдрэмж сайтай тоглогчид байгаа. Тэрнээс өнөөдрийнх шиг тогловол Хасын Хүлэгүүд үлдсэн бүх тоглолтондоо л амархан хожно.

Хүлэгүүдээс энэ тоглолтонд Ц.Мэргэн, О. Сайнбаяр нарын нуруулаг тоглогчид нь давуу байдлаа ашиглан сайн тоглолоо.