Гараанаас эхтэй Баттоны ялалт

Т.Глок замын бохир талд байсан ч маш гайхалтай гарааг хийж Труллиг орхин уралдааныг хошуучилж эхэлсэн. Хэмилтон KERS ийн тусламжтайгаар байрлалаа ахиулсан ч хоёрдахь тойрогт Баттонд гүйцэгдсэн юм. Баттон Хэмилтоныг гүйцээд зогссонгүй уралдаанд гол өрсөлдөгч нь байсан Феттелийг ардаа орхиж чадсан нь шийдвэрлэх гол үйл явдал байлаа.

Феррарид тохиолдсон дараагийн асуудал

Улаануудад учирсан дараагийн бэрхшээл нь гараан дээр болсон бяцхан мөргөлдөөнөөр дууссангүй. Бүх уралдааны турш Массагийн машины телеметрийн мэдээлэл байхгүй байжээ. Баг нь түүнийг юу хийж, машинд нь ямар асуудал байгааг тогтоох боломжгүй байв. Мөн Ферраригийн KERS систем нь бүрэн ажиллаагүй учир гараанаас довтлогоо хийж чадсангүй. Райконенийг цэнэглэхэд цаг алдсанаар Барикеллог гүйцэх боломжийг үгүй хийв.

БМВ Зауберийн удаан байсан шалтгаан

Телеметрийн мэдээллээр Хайдфелдийн машин асуудалтай байгааг олж тогтоожээ. Ингээд тактикаа өөрчлөн машинаа дүүрэн цэнэглэж, хатуу дугуйтай уралдав. Тэдний найдвар бол аюулгүйн машин зам дээр гарч ирэх явдал байв. Гэвч ямар ч аюулгүйн машин гарч ирсэнгүй. Хатуу дугуй удаан байсан гол шалтгаан болжээ.

Глокийн алтан боломж талаар болсон

Гарааг гайхалтай хийсэн ч шагналын тавцанд гараагүй нь Тимогийн хувьд маш харамсалтай. Тэрээр анхны зогсолтоос эхлэн байрлал нь ухарсаар байв. Тоёота буруу үед хатуу дугуйны сонголтыг хийснээр тактикийн алдаа хийсэн юм.

Алонсод юу тохиолдов ?

Реногийн техникийн шинэчлэл болон Фернандо Алонсогийн шаргуу дайчин чанар Шакирийн цөлд багагүй амжилт олно гэсэн найдварыг төрүүлж байв. Гэвч төлөвлөөгүй бэрхшээл Алонсод тохиов. Түүний машины уух шингэний товчлуур ажиллагаагүй болж бүхэл уралдааны турш хуурай амтай давхижээ. Аагим халуунд уух шингэнгүй уралдааныг төгсгөсөн Алонсо машинаасаа гараад унах дөхсөн байна.